Փորձագետ. Հայաստանի նախագահի հայտարարությունը միանգամայն նոր իրողություն է ստեղծում

ԵՐԵՎԱՆ, 30 սեպտեմբերի–Sputnik. Արցախյան հակամարտության շուրջ ամբողջ բանակցային գործընթացը չեղյալ է համարվում, քանի որ հակառակորդը դիմեց այնպիսի քայլերի, որոնցից հետո անիմաստ է խոսել քաղաքակիրթ, մարդկային լեզվով, Sputnik Արմենիա ռադիոկայանին ասել է «Ռազմ–ինֆո» մասնագիտացված կայքի համակարգող Կարեն Վրթանեսյանը։

«Ադրբեջանի արածը ռազմական հանցագործություն է», – նշել է Վրթանեսյանը` մեկնաբանելով ՀՀ նախագահի ասածն այն մասին, որ Արցախը Հայաստանի անբաժանելի մասն է։

Փորձագետի խոսքով՝ Հայաստանի պատմության մեջ առաջին անգամ էր, որ երկրի առաջին դեմքը նման հայտարարություն է անում, ինչը նոր իրողություն է ստեղծում:

«Սա այն չէր, ինչին ձգտում էին ադրբեջանցիները: Գուցե նրանք փորձում էին վախեցնել, բայց չկարողացան ճիշտ պահին կանգ առնել, և ինձ թվում է, որ նրանք արդեն չեն վերահսկում իրավիճակը», – նշել է Վրթանեսյանը։

Փորձագետը նաև նշել է, որ ՊՆ-ի հայտարարության մեջ նշվել է, որ այսուհետև  հրթիռահրետանային հարվածներ են հասցվելու թշնամու ուղղությամբ:

«Սա շատ մոտ է այն իրավիճակին, որ հակառակորդի համար ինչ- որ անվերահսկելի գործողություններ են  լինելու», – ընդգծել է փորձագետը։

Նա ավելացրել է նաև, որ եթե միջազգային հանրությունը ի վիճակի չէ կատարել իր պարտավորությունները, ապա հայկական կողմը ստիպված է լինելու դա վերցնելու իր վրա։

Անդրադառնալով բանակցային գործընթացին՝ փորձագետը նշել է՝ անկախ իրավիճակի զարգացումից, եթե բանակցություններ սկսվեն, ապա ամեն ինչ կսկսվի զրոյից:

«Ադրբեջանի համար լինելու է նոր հրադադարի ստորագրման պայմանագիր: Ադրբեջանն ամեն ինչ արեց, որպեսզի սկսվի լրիվ նոր շրջան ՝ թե բանակցային, թե ռազմական մասով: Ադրբեջանը հրետակոծեց հայկական բնակավայրերը՝ սպանելով խաղաղ բնակիչների»,- ասել է նա։

Նրա կարծիքով` Ադրբեջանը վաղուց փորձում է դուրս գալ Մինսկի խմբի ձևաչափից, բայց նրան դա չի հաջողվում, քանի որ համանախագահները ևս դեմ են:

Վրթանեսյանը նաև հավելում է, որ ձևաչափ փոխելու հարց կար, քանի որ իրականում Ալիևին Արցախի խնդրի լուծում պետք չէ. նրան պետք է «տրիումֆալ հաղթանակ»: 

Փորձագետի խոսքով` նախագահի հայտարարությունից հետո Ադրբեջանի առաջին արձագանքն այն կոծկելն էր։

«Մեդիա դաշտում նրանք կոծկեցին, թեթևակի հեգնական հոդվածներ հրապարակեցին, բայց հիմնականում կոծկեցին: Կարծում եմ, նրանք թաքցնելու խնդիր ունեին: Նրանք չէին սպասում նման արձագանքի: Ադրբեջանի ՊՆ-ն ամեն գնով փորձում է թաքցնել կորուստները: Համոզված եմ, կորուստներն ավելի շատ են, քան ցույց են տալիս», — նշել է նա։

Վրթանեսյանն ավելացրել է, որ Ադրբեջանը պատրաստ չէ լայնածավալ պատերազմի, նախ բիզնեսի առումով, Ալիևը պարտավորություններ ունի արևմտյան գործընկերների հանդեպ, երկրորդը՝ կկորցնի կուտակած հարստությունը

«Բացի դրանից, նա բավական զգույշ է, փորձում է զինված ուժերը բաժանել տարբեր խմբավորումների, որ հանկարծ իր դեմ չաշխատեն: Նա բավական անվստահ է իր ուժերի վրա: Դա վկայում է ընդդիմադիրների դեմ գործողությունները, նա վախենում է հրապարակային որևէ քննադատությունից», – հավելել է փորձագետը։

Նրա կարծիքով` ուժային կառույցներն Ադրբեջանում այնպես են բաժանված, որ հանկարծ ոչ մի խաղացողի ձեռքում չհայտնվի ավելորդ ուժ:

«Պատերազմական վիճակն Ալիևի համար խիստ վտանգավոր է, առավել ևս, որ նա չունի պատերազմական փորձ, ժողովուրդը չի ընկալում նրան որպես ռազմական ղեկավարի», – նշել է Վրթանեսյանը։

Ըստ փորձագետի` հանրային տրամադրվածությունը Հայաստանում այժմ այնպիսինն է, որ շատերը նախընտրում են պատերազմը, միայն թե, այս իրավիճակին երկարաժամկետ վերջ դրվի։

«Բայց երբևէ չի կարելի մոտենալ պատերազմին պաթոսային «մենք կգնանք, մենք կհաղթենք» կարգախոսով: Պատերազմի համար նախագծված որևէ ծրագիր լիովին չի գործում, միշտ փոփոխություններ են լինում: Հիմա նույնիսկ սահմանամերձ գյուղերի բնակիչներն ասում են, որ ավելի լավ է կռիվ լինի ու իրենք առաջ գնան, քան հանդուրժեն այս իրավիճակը, երբ տանը նստած չգիտես ինչ կլինի քեզ հետ: Մարդիկ, որ ամեն օր կրակոցների տակ են, գերադասում են երկարաժամկետ լռեցնել թշնամուն», – ընդգծել է Վրթանեսյանը։

Ինչ վերաբերում է տեղեկատվական դաշտի հոսքերին, ապա Կարեն Վրթանեսյանը նկատում է, որ լարված իրավիճակում ցանկացած անզգույշ բառ կարող է «հրդեհ» առաջացնել:

«Պետք  է շատ ուշադիր լինել տեղեկատվական հիգիենային», — եզրափակել է «Ռազմ-ինֆո» մասնագիտացված  կայքի համակարգողը։