Հայաստանը բարելավել է դիրքերը ըստ Համաշխարհային մրցունակության ցուցիչի

ԵՐԵՎԱՆ, 30 սեպտեմբերի– Sputnik. Հայաստանը 2015 թ.–ին 140 երկրների շարքում զբաղեցրել է 82–րդ տեղը Համաշխարհային մրցունակության ցուցիչով` բարելավելով դիրքերը երեք կետով։

Այս տարի հարցմանը մասնակցել են խոշոր և փոքր/միջին բիզնեսի ոլորտում գործող 80–100 հայկական կազմակերպությունների ղեկավարներ։

«Հայաստանի դիրքերը մրցունակության գնահատման գրեթե բոլոր չափորոշիչներով չեն տարբերվում նմանատիպ երկրներից, բացառությամբ շուկայի չափի, ինչը պայմանավորված է օբյեկտիվ պատճառներով», – չորեքշաբթի Sputnik Արմենիա միջազգային մամուլի կենտրոնում լրագրողներին ասաց «Տնտեսություն և արժեքներ» հետազոտական կենտրոնի նախագահ Մանուկ Հերգնյանը։

Նրա խոսքով` վարկանիշում Հայաստանի մոտ հարևաններն են Տաջիկստանը (80–րդ տեղ), Հունաստանը (81), Լաոսը (83) և Մոլդովան (84)։ Միաժամանակ Հայաստանն ու Վրաստանն այն երկրների թվում են, որոնք տնտեսական զարգացման հարցում գտնվում են արդյունավետության վրա հիմանված փուլում։ Իսկ Ադրբեջանը գտնվում է նախորդ փուլում, որը հիմնված է ռեսուրսների վրա։

Ինչ վերաբերում է ԱՊՀ երկրներին, ապա, ինչպես նշեց Հերգնյանը, Հայաստանն առաջ է անցնում միայն Մոլդովայից (84–րդ տեղ) և Ղրղըզստանից (102)` զիջելով Ադրբեջանին (40), Ղազախստանին (42), Ռուսաստանին (45), Վրաստանին (66), Ուկրաինային (79), Տաջիկստանին (80)։

Նա նշեց, որ Հայաստանն անկում է գրանցել 12 հիմնական կատեգորիաներից միայն 5–ում` մնացած կատեգորիաներում աճ գրանցելով 2–16 կետով։ Միաժամանակ ամենաբարձր աճը (14 և 16 կետերով) գրանցված է, համապատասխանաբար, ապրանքային շուկայի և աշխատաշուկայի արդյունավետության կատեգորիաներում։

Հայաստանի վարկանիշում տեղի ունեցած առավել հետաքրքիր փոփոխությունների թվում Հերգնյանն առանձնացրեց պետական քաղաքականության թափանցիկությունը` 51–րդ տեղ (անկում` 12 կետով), փոքր բաժնետերերի շահերի պաշտպանությունը` 108–րդ տեղ (անկում` 11 կետով)։ Հետաքրքիր է նաև այն փաստը, որ ներդրողների պաշտպանության ցուցանիշում 26 կետով անկման դեպքում Հայաստանը, այդուհանդերձ, այդ ցուցանիշով զբաղեցրել է առաջատար դիրքեր` 48–րդ տեղը 140 երկրների շրջանում։

Երկրների առաջին տասնյակը գրեթե անփոփոխ է վերջին տարիների` Շվեյցարիա (1), Սինգապուր (2), ԱՄՆ (3), Գերմանիա (4), Նիդեռլանդներ (5), Ճապոնիա (6), Հոնկոնգ (7), Ֆինլանդիա (8), Շվեդիա (9) և Մեծ Բրիտանիա (10)։

Հայաստանը 2005 թ.–ին առաջին անգամ ներառված է Համաշխարհային մրցունակության զեկույցում` աշխարհի 117 երկրների շրջանում զբաղեցնելով 79–րդ տեղը։ Դրանից հետո երկրի դիրքերը փոքր–ինչ տատանվեցին` մնալով, սակայն, միևնույն մակարդակում։ Եթե 2010 թ.–ին Հայաստանի դիրքերը վատացան, և այն 139 երկրների շրջանում զբաղեցրեց 98–րդ տեղը, ապա արդեն 2013 թ.–ին վարկանիշը կրկին բարձրացավ` 148 երկրների շրջանում զբաղեցնելով 79–րդ տեղը։ 2014 թ.–ին Հայաստանն աշխարհի 144 երկրների շրջանում զբաղեցրել է 85–րդ տեղը։

Համաշխարհային տնտեսական համաժողովն անկախ միջազգային կազմակերպություն է, որի առաքելությունն է լավացնել աշխարհում ստեղծված իրավիճակը առաջնորդների միջև գործընկերություն հաստատելու միջոցով` գլոբալ մասշտաբով, ինչպես նաև տարածաշրջանների և բնագավառների մակարդակում օրակարգ ձևավորելու նպատակով։

«Տնտեսություն և արժեքներ» հետազոտական կենտրոնը «Համաշխարհային տնտեսական համաժողովի» մրցունակության գլոբալ ցանցի գործընկերն է։