ԵՐԵՎԱՆ, 30 սեպտեմբերի– Sputnik. Հայաստանում յուրաքանչյուր 16–րդ կինը տառապում է կրծքագեղձի քաղցկեղով, տեղեկացրեց առողջության հայ–ամերիկյան կենտրոնի տնօրեն Խաչանուշ Հակոբյանը։
«Հոկտեմբերը կրծքագեղձի քաղցկեղի դեմ պայքարի ամիսն է, սակայն ես կցանկանայի, որպեսզի տարվա բոլոր ամիսները դառնային այս հիվանդության դեմ պայքարի ամիսներ», – չորեքշաբթի ասուլիսի ժամանակ ասաց Հակոբյանը։
Նրա խոսքով` կենտրոնի գործունեության 19 տարվա ընթացքում կենտրոնի մասնագետները հետազոտել են ավելի քան 400 հազար կանանց, և մոտ 12 հազարի մոտ ախտորոշել են քաղցկեղ։
«Նշեմ, որ 8200–ը հետազոտության է եկել առանց որևէ արտահայտված ախտանիշի, ինչը թույլ տվեց քաղցկեղն ախտորոշել սկզբնական փուլերում։ Ընդհանուր առմամբ, մեր հասարակությունն այս տարիների ընթացքում դարձել է շատ ավելի իրազեկ այս հարցում», – ասաց Հակոբյանը։
Նրա խոսքով` ամեն օր կենտրոնում հետազոտվում է ավելի քան 200 կին։
«Վերջին տարիներին Հայաստանում մենք չենք նկատում կրծքագեղձի քաղցկեղով հիվանդացության աճի միտում։ Սակայն ընդհանուր վիճակագրական տվյալներ չունենք», – ասաց Հակոբյանը` պատասխանելով Sputnik Արմենիա պորտալի հարցերին։
Գինեկոլոգ Արտեմ Ստեփանյանն իր հերթին կոչ արեց կանանց պարբերաբար հետազոտվել և վարել առողջ կենսակերպ, ինչը նվազեցնում է հիվանդությունների ռիսկը։ Նա ևս մեկ անգամ հիշեցրեց, որ կրծքագեղձի քաղցկեղն այսօր դատավճիռ չէ, այլ բուժվող հիվանդություն։
Կրծքագեղձի քաղցկեղի դեմ պայքարի ամսվա շրջանակում կենտրոնը հայտարարում է զեղչեր, իսկ հոկտեմբերի 10–14–ը կենտրոնը Ղարաբաղում անվճար ծառայություններ կմատուցի։
Փորձագետ. Հայաստանում յուրաքանչյուր 16–րդ կինը տառապում է կրծքագեղձի քաղցկեղով
13:41 30.09.2015 (Թարմացված է: 17:47 12.10.2015)
© Sputnik / Владимир Богатырев
/ Բաժանորդագրվել
Առողջության հայ–ամերիկյան կենտրոնի գործունեության 19 տարիների ընթացքում կենտրոնի մասնագետները հետազոտել են ավելի քան 400 հազար կանանց, և մոտ 12 հազարի մոտ ախտորոշել են քաղցկեղ, տեղեկացրեց կենտրոնի տնօրեն Խաչանուշ Հակոբյանը
