Վաշինգտոնն այլևս Ասադի անհապաղ հրաժարականի կոչ չի անում

ԵՐԵՎԱՆ, 30 սեպտեմբերի– Sputnik. ԱՄՆ–ն պահանջում է Սիրիայում իշխանության «սահուն անցում» և երկրի նախագահ Բաշար Ասադի անհապաղ հրաժարականի կոչ չի անում, CNN հեռուստաալիքին տված հարցազրույցում հայտարարել է ԱՄՆ պետքարտուղար Ջոն Քերին։

«Մենք փոխեցինք դա… այդպես չի գործի։ Հարկավոր է սահուն, վերահսկվող անցում, որպեսզի մտավախություններ չլինեն դատաստանի, կորած կյանքերի և վրեժի մասին», – նշել է Քերին` ի պատասխան լրագրողի պնդմանն այն մասին, թե ավելի վաղ ԱՄՆ–ն պահանջում էր Ասադի անհապաղ հրաժարականը։ Նա ավելացրել է, որ եթե Ասադն իր պաշտոնից հեռանա ավելի արագ, ապա դա կարող է հանգեցնել «դեպի ներս ուղղված պայթյունի», ինչը կզրկի երկրին ցանկացած հասարակական կյանքից։

Ինչպես նշում է հեռուստաալիքը, այսպիսով` Քերին տեղեկացրել է ԱՄՆ–ի դիրքորոշման փոփոխության մասին։

Բացի այդ, Քերին հարցազրույցում նշել է, որ սիրիական հակամարտության լուծման հարցում Ռուսաստանի ներգրավվածությունը կարող է «հնարավորություն» դառնալ` ճգնաժամի լուծման համար։

ՌԴ նախագահ Վլադիմիր Պուտինը, երկուշաբթի ելույթ ունենալով ՄԱԿ–ի Գլխավոր վեհաժողովի հոբելյանական նստաշրջանին, կոչ է արել համաշխարհային հանրությանը ստեղծել լայնամասշտաբ միջազգային հակաահաբեկչական կոալիցիա` իսլամական երկրների մասնակցությամբ։ Ռուսաստանը, Իրանը, Իրաքն ու Սիրիան Բաղդադում ավելի վաղ ստեղծել էին ընդհանուր տեղեկատվական կենտրոն` ԻՊ–ի դեմ պայքարը համակարգելու համար։

Սիրիայում 2011 թ.–ի մարտից շարունակվում է զինված հակամարտությունը, որի հետևանքով, ՄԱԿ–ի տվյալներով, զոհվել է ավելի քան 220 հազար մարդ։

Կառավարական զորքերը դիմակայում են տարբեր զինված միավորումների գրոհայինների ջոկատների։ Առավել ակտիվ են «Իսլամական պետություն» և «Ջեբհաթ ան–Նուսրա» ծայրահեղական խմբավորումների գրոհայինները։

ԻՊ–ի դեմ պայքարի միասնական ճակատ չկա։ Խմբավորման դեմ պայքարում են Սիրիայի և Իրաքի կառավարական զորքերը, միջազգային կոալիցիան` ԱՄՆ–ի գլխավորությամբ, որը դեռևս սահմանափակվում է օդից հասցվող հարվածներով, ինչպես նաև քրդերը, լիբանանցի և իրաքցի շիիթական աշխարհազորայինները։ Ռազմական գործողությունների հետևանքով զոհվել են հարյուր հազարավոր խաղաղ բնակիչներ, մի քանի միլիոնը փախստական են դարձել։