«Միսս Իրաք» մրցույթը հետաձգվել է մասնակիցների հասցեին հնչած սպառնալիքների պատճառով

ԵՐԵՎԱՆ, 29 սեպտեմբերի– Sputnik. «Միսս Իրաք» գեղեցկության ազգային մրցույթի եզրափակիչ շոուն հոկտեմբերի 1–ից տեղափոխվել է, հավանաբար, դեկտեմբեր` կրոնական համայնքների դժգոհության և մասնակիցների հասցեին հնչող սպառնալիքների պատճառով, նշվում է մրցույթի Facebook–յան էջում։

Իրաքի շիիթները մեղադրել են մրցույթի կազմակերպիչներին «մասոնության» և «սիոնիզմին հանցակից լինելու» համար։ Միաժամանակ «Իսլամական պետությանն» աջակցող սունիթները սպառնում են մասնակիցներին արյունոտ դատաստանով։

Մրցույթը պետք է անցկացվեր Իրաքի հարավում գտնվող Բասրա նավահանգստային քաղաքում։

«Միսս Իրաք 2015» մրցույթը վերջին 44 տարվա ընթացքում Իրաքում առաջին անգամ կազմակերպված գեղեցկության մրցույթն է, որն անցկացվում է Miss World–ի և Miss Universe–ի չափանիշներով։

Իրաքի ներկայացուցիչը` Վիջդան Բուրխան ադ–Դին Սուլիյմանն առաջին և վերջին անգամ մասնակցել է «Միսս տիեզերք» մրցույթին 1972 թ.–ին։ Այն ժամանակ մրցույթն անցկացվում էր Պուերտո Ռիկոյում` չափազանց լարված միջազգային իրավիճակի ֆոնին, մասնավորապես, շոուից երկու ամիս առաջ ահաբեկչություն էր կազմակերպվել այն հյուրանոցում, որտեղ իջևանել էր «Միսս ԱՄՆ–ն»։

Իրաքի մուսուլմանական համայնքը դատապարտում էր Վիջդան Սուլիյմանին «սատանայական» մրցույթին մասնակցելու համար, և դրանից հետո Իրաքի գեղեցկուհիները ոչ մի անգամ չեն մասնակցել գեղեցկության միջազգային մրցույթներին, բացառությամբ Եգիպտոսում անցկացվող «Արաբական աշխարհի միսս» համեստ մրցույթների։

«Միսս Իրաք 2015» մրցույթի կազմակերպիչները ցանկանում էին խախտել այդ «ավանդույթը», սակայն բախվեցին կրոնական կղերականների կոշտ դիմակայությանը։

Այսօրվա դրությամբ մասնակիցներից երկուսը հրաժարվել են մասնակցել մրցույթին, քանի որ նրանց սպառնացել են սպանել։