ԵՐԵՎԱՆ, 29 սեպտեմբերի– Sputnik. Այսօր նշվում է Սուրճի համաշխարհային օրը։ Սուրճը վաղուց մոլորակի միլիոնավոր բնակիչների «լավագույն ընկերն» է դարձել։ Որոշ տվյալներով` աշխարհում տարեկան 760 միլիարդ բաժակ սուրճ են խմում։
Հայաստանն այն երկրների շարքում է, որոնց բնակիչների մեծ մասը սուրճի մոլի սիրահարներ են։ Հայերը սուրճ են խմում միշտ և ամենուրեք, կլորին տարին, օրվա ցանկացած ժամին։ Այստեղ ամենատարածվածն արևելյան սուրճն է` «սև սուրճը»։ Եթե Հայաստանում դուք որևէ մեկին հյուր եք գնում, ձեզ անպայման հարցնում են` սուրճ ուզո՞ւմ եք։ Իսկ լուծվող սուրճը նախընտրում է հիմնականում երիտասարդությունը։
Sputnik Արմենիա պորտալը որոշել է պարզել, թե հայտնի մարդիկ ինչպես են վերաբերվում անուշաբույր և առույգացնող ըմպելիքին։
Հայաստանի կրթության և գիտության նախարար Արմեն Աշոտյան
Նախարարը նախընտրում է թունդ և տաք սուրճ խմել` առանց շաքարի։ Sputnik Արմենիայի հարցին, թե որ տարբերակն է նախընտրում` էսպրեսո՞, թե՞ ամերիկանո, Աշոտյանը պատասխանեց «կրկնակի էսպրեսո, եթե շատ չեմ շտապում, իսկ ամերիկանո, եթե խոսելու բան կա»։
Զարմանալի է, բայց նախարարը նշեց, որ օրական մինչև 10 բաժակ սուրճ է խմում։
Հայտնի հաղորդավարուհի և դերասանուհի Նազենի Հովհաննիսյան
Նազենին սև սուրճ է սիրում և նախընտրում է սուրճը եփել տանը։ «Եթե լուծվող սուրճ է, ապա ավելի լավ է, երբ էսպրեսո է կամ ամերիկանո` ջրի մեծ չափաբաժնով»,– ասաց Հովհաննիսյանը։
Հաղորդավարուհին խոստովանեց, որ սուրճը միայն տաք վիճակում է խմում, անգամ ամռանը։ «Երբեմն սառը սուրճ էլ եմ խմում սառույցով, սակայն առանց շաքար կամ այլ բան ավելացնելու»,– ասաց Հովհաննիսյանը։
Դերասանուհին ավելացրեց, որ սուրճը սկսել է հաճախ խմել ուսանողական տարիներին, քանի որ ուսանողները հենց այդ տարիքում էներգիայի հավելյալ աղբյուրի կարիք են ունենում։
Հովհաննիսյանը հայտնեց, որ այժմ փորձում է նվազեցնել սուրճի չափաբաժինը, քանի որ այն օրգանիզմից դուրս է բերում կալցիումը։ Երկարամազ գեղեցկուհին նշեց, որ սուրճի մեծ քանակությունը կարող է վնասել մազերն ու մաշկը։
«Սակայն իմ առավոտը սկսվում է սուրճից»,– ասաց նա և ավելացրեց, որ եթե երեկոյան վեցից հետո սուրճ խմի, ապա այլևս քնել չի կարողանա։
Նազենին ասաց նաև, որ մեզ համար սուրճն ասոցացվում է սիրո հետ։ «Գուցե ծեծված ու չափազանց ճոռոմ հնչի, բայց սուրճը «աֆրոդիզիակ» է, որը ուզես, թե չուզես, ազդում է մարդու վրա։ Սուրճի համն ու բույրը ավելի մեծ ազդեցություն են գործում, քան հենց սուրճը։
Էստրադային երգիչ Էրիկ
Էրիկը նախընտրում է քաղցր սուրճը, առանց կաթի, խմում է օրական երեք բաժակ։ «Սուրճ եմ խմում, որպեսզի չքնեմ։ Հայաստանում ավելի հաճախ սև սուրճ եմ խմում, բայց եթե սև սուրճ չկա, խմում եմ այն, ինչ կա»,– ասաց երգիչը։
Էրիկը նախընտրում է ամերիկանո խմել։ «Էսպրեսոն ինձ համար շատ թունդ է, խմում եմ, երբ բոլորովին ուժ չեմ ունենում։ Արաբիկա չեմ սիրում. թթվաշ սուրճ է` առանձնահատուկ համով»,– ասաց երգիչը։ Նրա կարծիքով` այդ ըմպելիքը միավորում է մարդկանց` «սուրճը մեր ամենօրյա կյանքի անբաժանելի մասն է դարձել, մենք այն խմում ենք ամենուրեք և ամենքի հետ` ընկերների, հարևանների…»։
«Ես շատ վաղուց եմ սկսել սուրճ խմել։ Անգամ չեմ հիշում, թե երբվանից։ Հիշում եմ, որ սկզբում սուրճ չէի սիրում»,– ավելացրեց Էրիկը։
Իսկ վերջում` փոքրիկ վիճակագրություն. մաքսային ծառայության տվյալով` տարեկան Հայաստան է ներմուծվում 10 հազար տոննա սուրճ (ներառյալ՝ փոխարինիչները, թեփուկները, հատիկների պատյանները)։
