Արաբագետ. ԱՄՆ–ն ու Ռուսաստանը Սիրիայի հարցում որոշակի պայմանավորվածությունների են հասել

ԵՐԵՎԱՆ, 29 սեպտեմբերի – Sputnik. ԱՄՆ–ն ու Ռուսաստանը կարողացան որոշակի պայմանավորվածությունների հասնել սիրիական հարցում, Sputnik Արմենիա պորտալին ասաց արաբագետ Սարգիս Գրիգորյանը` մեկնաբանելով  ՌԴ–ի և ԱՄՆ–ի նախագահներ Վլադիմիր Պուտինի և Բարաք Օբամայի երեկվա հանդիպումը։

Ռուսաստանի և ԱՄՆ–ի նախագահներ Վլադիմիր Պուտինն ու Բարաք Օբաման երկուշաբթի երեկոյան վերջին երկու տարվա ընթացքում առաջին երկկողմ հանդիպումն են անցկացրել, որի ընթացքում քննարկել են Սիրիայի և Ուկրաինայի հակամարտությունները։
Պուտինի և Օբամայի հանդիպումը կարելի է «դիրքորոշումների ճշտում» անվանել։ Մտքերի փոխանակություն նախկինում էլ էր եղել, սակայն այս անգամ Սիրիայի վերաբերյալ դիրքորոշումները մոտեցնելու որոշակի միտումներ երևացին, ասաց արաբագետ Սարգիս Գրիգորյանը։

Նրա խոսքով` ՄԱԿ–ում հնչած ելույթները ցույց տվեցին, թե ինչպես են արևմտյան երկրներն իրենց դիրքորոշումները փոխել Սիրիայի նախագահ Բաշար Ասադի ապագա կարգավիճակի հարցում։

«Երբ նախկինում նրան նույնիսկ բանակցությունների փուլում չէին տեսնում, ապա այժմ «մեսիջներ» են ուղղում այն մասին, որ նա կարող է մասնակցել բանակցությունների որոշակի փուլին։ Գլխավոր վեհաժողովի ընթացքում ասվեց, որ Ասադը բռնակալ է, նա պետք է հեռանա և Սիրիայի ապագայի հետ որևէ ընդհանուր կապ պետք է չունենա, սակայն այդ հայտարարություններն ավելի շատ դեկլարատիվ բնույթ էին կրում»,– նշեց Գրիգորյանը։

Նա ընդգծեց, որ Սիրիայի հարցում շատ բան կախված է ոչ թե Պուտինի և Օբամայի բանակցություններից, այլ երկրի տարածքում տեղի ունեցող իրադարձություններից, քանի որ առաջնահերթ են հենց ներսիրիական զարգացումները, որոնք անկանխատեսելի են։
 
Տարբեր գնահատականով` Սիրիայում և Իրաքում ԻՊ–ի վերահսկողության տակ գտնվող տարածքները կազմում են մոտ 90 հազար քառակուսի կիլոմետր, ահաբեկիչները հայտարարել են, որ խալիֆայություն են ստեղծում` սեփական օրենքներով և իշխանության մարմիններով։ Ծայրահեղական կազմակերպության թվաքանակի մասին տվյալները ևս տատանվում են (50–200 հազար գրոհային)։