Փորձագետ. Ադրբեջանի գործողություններն ահաբեկչական բնույթ են կրում

ԵՐԵՎԱՆ, 29 սեպտեմբերի– Sputnik. Ադրբեջանի գործողություններն ահաբեկչական բնույթ են կրում, երեքշաբթի լրագրողներին ասաց ՀՀ պաշտպանության նախարարությանն առընթեր Հանրային խորհրդի նախագահ Գեղամ Հարությունյանը։

Ուրբաթ Ղարաբաղի ուժերի դիրքերի նկատմամբ իրականացված հրետանահրթիռային հարվածի հետևանքով զոհվել են ԼՂՀ ՊԲ չորս զինծառայողներ։ Դրա նախորդ օրը Հայաստանի հյուսիսում գտնվող բնակավայրերի ուղղությամբ Ադրբեջանի իրականացրած գնդակոծությունների հետևանքով զոհվել է երեք խաղաղ բնակիչ։ Գնդակոծությունների ժամանակ Ադրբեջանի ԶՈւ–ն օգտագործում է հրետանի, համազարկային կրակի ռեակտիվ համակարգեր, ականանետներ և նռնականետներ։

«Այս գործողությունները կարելի է բնութագրել նաև որպես սանձարձակ և լկտի։ Ադրբեջանը հաշվի չի առնում միջազգային կարծիքն ու ստանձնած պարտավորությունները», – ասաց Հարությունյանը։

Նա նաև ընդգծեց, որ ստեղծված իրավիճակում հրադադարի ռեժիմ այլևս գոյություն չունի։

«Չենք կարող խոսել հրադադարի ռեժիմի մասին, քանի որ մշտապես սադրանքներ են կազմակերպվում, Ադրբեջանը պարբերաբար լարվածություն է ստեղծվում, իրականացվում են պատասխան գործողություններ, ինչի հետևանքով կողմերը կորուստներ են կրում», – ասաց Հարությունյանը։

ԼՂՀ ՊՆ–ի հաղորդագրության համաձայն` ղարաբաղյան կողմից կազմակերպված հատուցման ակցիայի հետևանքով Ադրբեջանի զինված ուժերն ունեցել են ավելի քան տասը զոհ, կան նաև վիրավորներ։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: