Անշլագ ունեցա՞ր, ուրեմն «վաստակավոր արտիստ» կդառնաս. Արմենչիկի հետքերով

ԵՐԵՎԱՆ, 29 սեպտեմբերի– Sputnik. Արդեն մեկ շաբաթ է անցել, ինչ ՀՀ նախագահը Անկախության օրվա կապակցությամբ պատվավոր կոչումներ և այլ մրցանակներ է հանձնել մշակույթի, արվեստի և սպորտի գործիչներին, իսկ պարգևատրման շուրջ բորբոքված կրքերը ոչ մի կերպ չեն հանդարտվում։

Պատճառն այն է, որ ՀՀ նախագահը վաստակավոր արտիստի կոչում է շնորհել երգիչ Արմենչիկին (Արմեն Գոնդրաչյան), ով Հայաստանում և սփյուռքում «ռաբիս» և փոփ–երաժշտության ոճում հանդես եկող ամենահայտնի երգիչներից է։

Կոչումներ շնորհելուց հետո սոցցանցերում անմիջապես հայտնվեցին ծաղրական դեմոտիվատորներն ու արվեստի հայտնի գործիչների և հասարակ քաղաքացիների վրդովված գրառումները. նրանք չէին կարողանում զսպել իրենց զարմանքը, թե այդ ո՞ր վաստակի համար է Արմենչիկն արժանացել նման բարձր կոչման։ Պարադոքսն այն է, որ չնայած հասարակական վրդովմունքի մեծ ալիքին, պետք է փաստել, որ Արմենչիկի համերգներն անցնում են մեծ անշլագով։ Լեփ–լեցուն դահլիճները մեծ հուզմունքով և ոգևորությամբ են ընդունում երգչին, հանդիսատեսն անդադար ձայնակցում է երգչին։

Լրագրողները ՀՀ ԱԺ կրթության, գիտության, մշակույթի, երիտասարդության և սպորտի հարցերի հանձնաժողովի նախագահ Արտակ Դավթյանից երեքշաբթի փորձել են պարզել, թե ինչու է նման իրարանցում առաջացրել նախագահի` կոչում շնորհելու որոշումը։

«Ես, որպես հասարակ քաղաքացի, չեմ լսում Արմենչիկին և նրա երաժշտության երկրպագուն չեմ, սակայն չի նշանակում, որ պետք է չհարգել հայ ազգի այն ներկայացուցիչներին, որոնց համար նա կուռք է», – ասաց Դավթյանը։

Նա նաև նշեց, որ երգիչը լեփ–լեցուն դահլիճներ է հավաքում ԱՄՆ–ում և Հայաստանում, նրա համերգները միշտ անցկացվում են անշլագով և «դա հարկավոր է գնահատել»։

Պատգամավորը նաև նշեց, որ արտիստներին կոչումներ շնորհելու հարցերով զբաղվում է համապատասխան գերատեսչությունը, այս դեպքում, ամենայն հավանականությամբ, Մշակույթի նախարարությունը, որն առաջնորդվում է հատուկ չափանիշներով և օրենքով սահմանված կարգով։ Միայն դրանից հետո է թեկնածությունը ներկայացվում նախագահի հավանությանը։