Ամենայն Հայոց Կաթողիկոսն ընդունել է Ռուս Ուղղափառ Եկեղեցու պատվիրակությանը

ԵՐԵՎԱՆ, 27 սեպտեմբերի– Sputnik. Ամենայն Հայոց Գարեգին Բ Կաթողիկոսը կիրակի Մայր Աթոռ Սուրբ Էջմիածնում ընդունել է Ռուս Ուղղափառ Եկեղեցու պատվիրակությանը` գլխավորությամբ Տամբովի և Ռասկազովսկի Գերաշնորհ Թեոդոսիոս Միտրոպոլիտի։

Հանդիպմանը Նորին Սրբությունն իր գոհունակությունն է հայտնել, որ Քույր Եկեղեցիների ներկայացուցիչները, ընդառաջ Մայր Աթոռ Սուրբ Էջմիածնի հրավերին, Սրբալույս Մյուռոնի օրհնության արարողության առիթով ժամանել են Հայաստան։

Վեհափառ Հայրապետն ընդգծել է, որ Հայոց Ցեղասպանության ոգեկոչման 100-րդ տարում Քրիստոնեական Եկեղեցիների ներկայությունը հոգևոր մեծ զորակցություն է Հայ Եկեղեցուն և հայ ժողովրդին:

Իր խոսքում Ամենայն Հայոց Կաթողիկոսը մասնավոր անդրադարձ է  կատարել Հայաստանյայց Առաքելական և Ռուս Ուղղափառ Եկեղեցիների ջերմ հարաբերություններին` նշելով, որ դրանք նաև երկու ժողովուրդների դարավոր բարեկամական կապերի արտահայտությունն են:

Իր հերթին Միտրոպոլիտ Թեոդոսիոսը Ամենայն Հայոց Հայրապետին է փոխանցել Մոսկվայի և Համայն Ռուսիո Կիրիլ Պատրիարքի եղբայրական ողջույնները` ուրախություն հայտնելով, որ Հայ Եկեղեցու կյանքում այս կարևոր արարողությանն իր մասնակցությունն է ունենալու։

Միտրոպոլիտը խոսել է նաև Հայ Եկեղեցու կողմից` Մեծ Եղեռնի նահատակների սրբադասման մասին, որը տեղի է ունեցել այս տարվա ապրիլի 23–ին Մայր Աթոռ Սուրբ էջմիածնում։ Այս կապակցությամբ Ռուս Եկեղեցու բարձրաստիճան ներկայացուցիչը նշել է, որ յուրաքանչյուր ժողովուրդ և երկիր եթե չի հիշում իր անցյալը, չունի նաև ապագա։