ԵՐԵՎԱՆ, 27 սեպտեմբերի– Sputnik. Ֆրանկոֆոնիայի միջազգային կազմակերպության անդամ երկրների արտգործնախարարների համաժողովին, որը մեկնարկում է Երևանում երկու շաբաթ հետո, սպասվում է շուրջ 80 անդամ և դիտորդ պատվիրակությունների մասնակցություն, հայտարարել է ՀՀ ԱԳ նախարար Էդվարդ Նալբանդյանը նախօրեին Նյու Յորքում ՖՄԿ անդամ երկրների արտգործնախարարների հանդիպմանը։
Ինչպես հաղորդում է ՀՀ ԱԳՆ–ի մամուլի ծառայությունը, Նալբանդյանը հույս է հայտնել, որ երևանյան հանդիպումը կարևոր ներդրում կունենա Ֆրանկոֆոնիայի միջազգային կազմակերպության ամրապնդման և միջազգային բեմահարթակում նրա դերակատարության բարձրացման գործում։
ՄԱԿ–ի Գլխավոր ասամբլեայի 70-րդ նստաշրջանի շրջանակներում կազմակերպված Ֆրանկոֆոնիայի միջազգային կազմակերպության անդամ երկրների արտգործնախարարների՝ Սենագալի նախագահության կողմից կազմակերպած հանդիպմանը ՀՀ ԱԳ նախարարը ներկայացրելէ ՖՄԿ անդամ երկրների արտգործնախարարների 31–րդ համաժողովի օրակարգում ներառված հարցերը, ինչպես նաև նշել է, որ Հայաստանը ուրախ է հյուրընկալելու նման հեղինակավոր և ներկայացուցչական միջազգային համաժողովը։
Իր խոսքում Էդվարդ Նալբադյանն անդրադարձել է մարդկության դեմ հանցագործությունների կանխարգելմանը, հակամարտությունների կարգավորմանը, անհանդուրժողականության և այլատյացության դեմ պայքարին, վերջին շրջանում մեծ թափ ստացած միգրացիոն հոսքերին առնչվող խնդիրներին, Փարիզում այս տարվա վերջին կայանալիք կլիմայական փոփոխություններին նվիրված գագաթնաժողովին։
