ԵՐԵՎԱՆ, 26 սեպտեմբերի– Sputnik. ՀՀ քննչական կոմիտեի Տավուշի մարզային քննչական վարչությունում հարուցվել են քրեական գործեր՝ ադրբեջանական մարտական դիրքերից 2015թ.–ի սեպտեմբերի 24-ին Հայաստանի սահմանամերձ գյուղերի 3 բնակչի սպանության, 4-ի նկատմամբ սպանության փորձ կատարելու, գույքի դիտավորյալ ոչնչացման դեպքերի առթիվ, հաղորդվում է ՀՀ քննչական կոմիտեի կայքում։
ՀՀ քննչական կոմիտեի Տավուշի մարզային քննչական վարչության վարույթում հարուցվել են քրեական գործեր «Սպանություն» և «Երկու և ավել անձանց սպանության փորձ ազգային, ռասայական կամ կրոնական թշնամանքի կամ կրոնական ֆանատիզմի դրդապատճառով, որը կատարվել է բազմաթիվ մարդկանց կյանքի համար վտանգավոր միջոցով» հոդվածներով, ինչպես նաև «Ունեցվածքի դիտավորյալ ոչնչացում կամ վնասում, որը կատարվել է հրկիզման, պայթեցնելու կամ այլ վտանգավոր միջոցներով և որը կատարվել է ազգային, ռասայական, կրոնական թշնամանքի կամ կրոնական ֆանատիզմի դրդապատճառով» հոդվածների հատկանիշներով։
Սահմանամերձ գյուղերի տուժած բնակիչներից յոթից հինգը կանայք են, որոնցից երեքը սպանվել են։ «Ադրբեջանի մարտական դիրքերից արձակած կրակոցների հետևանքով մահացածներն ու վիրավորները գտնվել են իրենց տներում կամ բակային տարածքում», – նշել են ՀՀ քննչական կոմիտեից։
«Կատարվում է քննություն, նշանակվել են փորձաքննություններ։ Դեպքերի վայրերում նույն օրն անհապաղ զննություն իրականացնել հնարավոր չի եղել, քանի որ հակառակորդը շարունակել է կրակել տարբեր տրամաչափի զենքերից», – նշվում է հաղորդագրության մեջ։
Նալբանդյանը վրդովմունք է հայտնել Ադրբեջանի կողմից հրադադարի ռեժիմի կոպիտ խախտման կապակցությամբ, ինչը հանգեցրել է մարդկային զոհերի Հայաստանի խաղաղ բնակչության շրջանում։
