Հայազգի զինվորականը փոխել է սեռը և կին դարձել

ԵՐԵՎԱՆ, 25 սեպտեմբերի – Sputnik. Բրիտանիայում հայազգի զինվորական Մեթյու Ավեդյանը, փոխել է սեռն ու կին դարձել։ Նրա անունն այժմ Սոնա է, հայտնում է thesun.co.uk կայքը։

Մեթյուն երեք տասնամյակ ապրել է որպես տղամարդ, ունեցել կին և դուստր, ինչպես նաև բարձր վարձատրվող աշխատանք, սակայն 2012 թվականի նոյեմբերին Մեթյու Ավեդյանը «որոշել է իր սրտին լսել», դիմել է վիրահատության ու կին դարձել:

Մեթյուն 8 ամիս շարունակ հորմոններ է ընդունել, նիհարել, հետո արել կրծքի պլաստիկ վիրահատություն, մազերի լազերային հեռացում ու վերջապես՝  սեռական օրգանների բարդագույն վիրահատություն: Ի վերջո խոշոր ու մազոտ ծովային հետևակայինը վերածվել է կնոջ, անունը` Սոնա:

Նա երկար տարիներ իր մեջ ճնշել է սեռը փոխելու ցանկությունը։ ինչպես նշված է հոդվածում, Մեթյուն առաջին անգամ 7 տարեկանում է զգացել, որ տարբերվում է մյուս տղաներից: Սակայն պատմում է, որ այլևս չէր կարող թաքցնել իր ցանկությունը։

«Ես այլևս չէի կարող թաքնվել, — պատմում է Սոնան, — իմ հոգեկան աշխարհի համար շատ ծանր փորձություն էր: Տարիներ շարունակ ես ստի մեջ եմ ապրել, ինքս ինձ ստել, սակայն հասկացել եմ, որ ժամանակն է անկեղծանալու։ Ես գիտեի, որ հասարակությունը չի ընդունի իմ որոշումը, սակայն ես ուզում էի կին լինել»:

Ըստ նրա` իր մայրը դեմ է եղել այս ամենին։

«Ես հավատացյալ ընտանիքից եմ և մայրս գտնում է, որ սա սխալ քայլ է, նորմերի ցանկացած խախտում նրանց համար անհանդուրժելի է», – ասել է նա։