Պեկինի բիենալեում ադրբեջանցիները փորձել են վնասել հայ նկարչի լուսանկարները

ԵՐԵՎԱՆ, 25 սեպտեմբերի – Sputnik. Հայաստանի տաղավարը ժամանակավորապես փակվել է Պեկինի միջազգային արվեստի բիենալեում, որի բացման արարողությունը տեղի է ունեցել այսօր: Այս մասին գրում է hetq.am–ը։

Ադրբեջանի ներկայացուցիչները փորձել են վնասել հայկական տաղավարի մասնակիցներից լուսանկարիչ Կարեն Միրզոյանի աշխատանքները: Վերջինս ներկայացրել է 5 լուսանկարներ, որոնց հերոսները զոհված ազատամարտիկի երեխաներն են:

Նրանք լուսանկարվել են իրենց հայրերի զոհված վայրերում, որոնք գտնվում են Արցախի ներկա տարածքում: Ադրբեջանցիների մոտ հատկապես ցնցում է առաջացրել լուսանկարներից մեկը, որտեղ պատկերված երիտասարդը զինվորական համազգեստով է:

Հայաստանի տաղավարի ֆեյսբուքյան էջում նշված է, որ մեր տաղավարը մեկ օրով փակվում է՝ ելնելով անվտանգության ապահովման պայմաններից:

«Մեր կազմակերպիչները գտան, որ անվտանգության նպատակով սա լավագույն որոշումն է, որը կայացվել է որոշ այցելուների ագրեսիվ վարքագծի պատճառով»,- նշված է էջում: Բիենալեն անցկացվելու է մինչ հոկտեմբերի 16-ը: Սա Հայաստանի երկրորդ մասնակցությունն է այս մշակութային իրադարձությանը (առաջին անգամ հայ պատվիրակները մասնակցել են 2012 թ., իսկ բիենալեն անցկացվում է 2003-ից):

Հայաստանը մասնակցում է հատուկ ցուցադրությամբ՝ «Երազավայր» («Dreamscapes») խորագրով: Հայաստանի տաղավարի համադրողը Աննա Գարգարյանն է: Ներկայացվել են Դավիթ Գալստյանի (Երևան), Կարեն Միրզոյանի (Երևան), Հրայր Սարկիսյանի (Լոնդոն), Ալեն Սայեղի (Բոստոն), Արարատ Մինասյանի (Երևան), Լիանա Մկրտչյանի (Ֆլորենցիա), Միքայել Օհանջանյանի (Ֆլորենցիա), Հրաչյա Վարդանյանի (Գյումրի) աշխատանքները:

Կարեն Միրզոյանն ասում է, որ տաղավարը վերաբացելու հարցը քննարկումների փուլում է նախագահականից մինչև մշակույթի նախարարություն: Զինվորական համազգեստով տղայի լուսանկարը և տեքստերը հանել են ցուցադրությունից: «Բացի դրանից՝ նրանք ուզում են, որ Ղարաբաղ բառը հանվի: Ասում եմ՝ ի՞նչ կապ ունի դա: Իրենք պատասխանում են, թե դուք ներկայացել եք որպես Հայաստան»,- նշում է Կարենը:

Կարենն իր նախագծի շուրջ ստեղծված իրավիճակի մասին հեռակա է տեղեկացել: Նա Պեկին չի մեկնել: Նա առաջարկել է հանված նկարի տեղում տեքստ գրել: Չի բացառվում, որ այսօր  ուշ երեկոյան հստակ լուծում գտնվի, որովհետև, ըստ Կարենի, հնարավոր է՝ Չինաստանում Հայաստանի դեսպանատունն ասի, որ լուսանկարը կարող են ցուցադրել:

Մանրամասները կարող եք կարդալ սկզբնաղբյուրում։