Աշխարհահռչակ լուսանկարիչների աշխատանքների ցուցահանդես կանցկացվի Երևանում

ԵՐԵՎԱՆ, 24 սեպտեմբերի– Sputnik. Երևանում սեպտեմբերի 28–ին կբացվի աշխարհահռչակ ժամանակակից լուսանկարիչների Art Raccord միջազգային ցուցահանդեսը, Sputnik Արմենիա պորտալին տեղեկացրեցին Raccord Group–ի մամուլի ծառայությունից։

Ցուցահանդեսը տեղի կունենա Հայաստանի նկարիչների միության ցուցահանդեսային սրահում։ Այն թույլ կտա լուսագրության սիրահարներին ծանոթանալ աշխարհահռչակ լուսանկարիչների ստեղծագործություններին և խոստանում է դառնալ նշանակալի իրադարձություն Հայաստանի լուսանկարչական և մշակութային կյանքում։

Ցուցադրությունում ընդգրկված է ավելի քան 80 հեղինակային ցուցանմուշ և ներկայացնում է 30 երկրներից ժամանած` անալոգային լուսանկարների 40 վարպետների ստեղծագործական գործունեությունը։

Լուսանկարները նկարահանվել են դասական ժանրերում` բնապատկեր, դիմանկար, սթրիթ–ֆոտո, ճարտարապետություն, առարկայական լուսանկար։ Ձեռագիր տպագրության տարբեր տեսակները, այդ թվում այլընտրանքային և հազվագյուտ տեսակները, այդ ֆոտոնմուշները վերածում են արվեստի իրական ստեղծագործությունների։ Ցուցադրությունում ներառված լուսանկարների ճնշող մեծամասնությունը հազվագյուտ նմուշներ են, այսինքն գոյություն ունեն եզակի` հեղինակային օրինակով։

Արվեստասերների կհետաքրքրեն նաև Դմիտրի Ռուբինշտեյնի, Կարեն Քարտաշյանի, «Magnum Photos» հայտնի ֆոտոգործակալության վարպետների աշխատանքները։

Ցուցահանդեսը կազմակերպել է Raccord Group ընկերությունը` Հայաստանի գրողների միության և Raccord Armenia ընկերության աջակցությամբ։

Ցուցահանդեսը կտևի մինչև հոկտեմբերի 5–ը։