HIGHFEST փառատոն. երևանցիներին սպասում է վիթխարի թատերական տոն

ԵՐԵՎԱՆ, 24 սեպտեմբերի– Sputnik. HIGHFEST-2015 ամենամյա միջազգային թատերական փառատոնի կազմակերպիչները խոստանում են հանդիսատեսին փառահեղ ծրագիր, հինգշաբթի լրագրողներին հայտնեց փառատոնի տնօրեն և հիմնադիր Արթուր Ղուկասյանը։

«Ամենանշանակալի իրադարձությունը կդառնա աշխարհահռչակ «Գլոբուս» շեքսպիրյան թատրոնի ելույթը, որը կներկայացնի «Համլետը»»,– ասաց Ղուկասյանը։

Նրա խոսքով` Հայաստանի բնակիչներին և փառատոնի հյուրերին սպասում է շատ հետաքրքիր և հագեցած ծրագիր։ «Ուրախացնում է, որ հայկական թատրոնների պրոֆեսիոնալ մակարդակը տարեցտարի բարձրանում է, թեև, ցավոք, մասնակիցների թիվն անփոփոխ է մնում»,– նշեց նա։

Ղուկասյանը հայտնեց, որ փառատոնին կներկայացվի ավելի քան 75 ներկայացում` 52 անվանակարգերում։ Մեծ թատերական միջոցառմանը կմասնակցի 250 մարդ աշխարհի 26 երկրից` արվեստի գործիչներ, հայտնի եվրոպական թատերական փառատոների նախագահներ, արտ–մենեջերներ։

Նա նշեց, որ փառատոնին մասնակցել ցանկացողներն ավելի շատ են եղել, սակայն ֆինանսական կամ այլ պատճառներով ոչ բոլորին է հաջողվել գալ Երևան։

Փառատոնի տնօրենը պատմեց, որ ծրագրում ամենատարբեր ժանրերի ներկայացումներ են` դրամա, պարային բեմադրություն, փողոցային ներկայացումներ, որոնք կարելի է դիտել Կամերային, Տիկնիկային, Փոքր թատրոններում, Ստանիսլավսկու անվան թատրոնում, Պատանի հանդիսատեսի թատրոնում, «Համազգային» թատրոնում։

Հիմնական ծրագրում սպասվում է Հրաչյա Ղափլանյանի անվան Երևանի դրամատիկական թատրոնի, «Միհր» թատրոնի, Հ. Թումանյանի անվան Տիկնիկային թատրոնի, Փոքր թատրոնի մասնակցությունը։

HIGHFEST թատերական փառատոնը մեկնարկում է հոկտեմբերի 1–ին «ՆՓԱԿ» նորարար փորձառական արվեստի կենտրոնում և կտևի մինչև հոկտեմբերի 8–ը։

Առաջին անգամ HAY FEST–ն անցկացվել է 2003թ.–ին։ Փառատոնի նպատակն է ներկայացնել հայ հանդիսատեսին համաշխարհային թատերական մշակույթը, նպաստել Հայաստանում թատերական արվեստի զարգացմանը և ներկայացնել այն միջազգային մակարդակում։

Sputnik Արմենիա պորտալը փառատոնի տեղեկատվական հովանավորն է։