Կարմիր Լուսին և լուսնային խավարում` երևանյան երկնքում

ԵՐԵՎԱՆ, 24 սեպտեմբերի– Sputnik. Հետաքրքիր աստղագիտական երևույթ է սպասվում առաջիկա օրերին նրանց, ովքեր սիրում են հետևել աստղերին` Կարմիր գերլուսին, վառ Ծիր կաթին, Վեստա աստերոիդ։

Այդ ամենը կտեսնե՞ն Հայաստանի բնակիչները, և դրանցից ո՞րն է իրականություն կամ հորինվածք, այս ամենը Sputnik Արմենիա պորտալը ճշտել է հայտնի աստղաֆիզիկոս Հայկ Հարությունյանի հետ, ով 12 տարի գլխավորել է Բյուրականի աստղադիտարանը

Նրա խոսքով` եթե եղանակը բարենպաստ լինի, Հայաստանի բնակիչները կարող են տեսել, այսպես կոչված, գերլուսինը։ Միաժամանակ նա նշեց, որ գերլուսինը բացառիկ երևույթ չէ։

«Իրականում գերլուսին կարելի է տեսնել, երբ Լուսինն առավելագույնս մոտ է գտնվում Երկիր մոլորակին, ինչի շնորհիվ մենք Լուսինը տեսնում ենք 10 տոկոսով ավելի խոշոր, քան սովորաբար», – ասաց Հարությունյանն` ավելացնելով, որ նման երևույթ տեղի է ունենում բավականին հաճախ։

Ինչ վերաբերում է Լուսնի կարմիր երանգին, ապա նա նշեց, որ «արյունոտ Լուսինը» ևս արտառոց երևույթ չէ։

«Լուսինը կարմիր երանգ է ստանում` կախված մթնոլորտային շերտի խտությունից և հորիզոնի գծին մոտենալիս։ Միաժամանակ երանգը կարող է փոխվել` բաց կարմիրից դառնալով բոսորագույն, քանի որ հորիզոնին մոտենալիս բաց կապույտ երանգները կլանվում են, ինչն էլ ստեղծում է «կարմիր Լուսնի» տպավորություն», – պարզաբանեց Հարությունյանը։

Նա նաև նշեց, որ կարմիր լուսին կարելի է տեսնել մայրամուտից անմիջապես հետո կամ վաղ առավոտյան` լուսաբացին։

Ինչ վերաբերում է Վեստա աստերոիդին, որը, ինչպես նշում են բազմաթիվ ԶԼՄ–ներ, կարելի է տեսնել անզել աչքով, ապա, Հարությունյանի խոսքով, դա այնքան էլ հեշտ չէ, ինչպես թվում է առաջին հայացքից։ Իրականում, նրա խոսքով, աստերոիդ տեսնելու համար կպահանջվի հատուկ տեխնիկա կամ հեռադիտակ, քանի որ անզեն աչքով անհնար է տեսնել այն։

Իսկ լուսնի խավարումը կուրախացնի հայ աստղասերներին միայն մասամբ։ Լուսնի խավարումն ամբողջությամբ հնարավոր կլինի տեսնել միայն Արևմտյան Եվրոպայում և Ամերիկայում։ Իսկ Հայաստանի բնակիչները սեպտեմբերի 27–ի լույս 28–ի գիշերը կկարողանան տեսնել լուսնի մասնակի խավարում` տեղական ժամանակով առավոտյան ժամը 6–ին։