ԵՐԵՎԱՆ, 24 սեպտեմբերի– Sputnik. Երևանում հինգշաբթի մեկնարկել է ArmBookExpo գրքի ցուցահանդեսը, որտեղ ներկայացված է շուրջ 5,4 հազար գիրք` հրատարակված 53 երկրներում 32 լեզուներով, որոնք պատմում են Հայաստանի, նրա մշակույթի և պատմության մասին։
«Ցուցահանդեսի անցկացումը երկու նպատակ է հետապնդում։ Առաջին հերթին, տեղեկացնել հայ ընթերցողին այն մասին, թե ինչ է հրատարկվում աշխարհում Հայաստանի մասին։ Երկրորդ, ցույց տալ մեր երկրում գտնվող արտասահմանցիներին, թե ինչպիսի գրքեր են հրատարակվում աշխարհում Հայաստանի մասին»,– ասաց Հայաստանի մշակույթի նախարարի տեղակալ Ներսես Տեր–Վարդանյանը։
Նրա խոսքով` ցուցահանդեսի տաղավարներում ընթերցողները կարող են գտնել իրենց համար հետաքրքրիր տեղեկություններ այն մասին, թե ինչպիսին է Հայաստանը աշխարհի աչքերով։ Բոլոր ցուցադրված գրքերը կարելի է ընթերցել Հայաստանի Ազգային գրադարանում։
«Հայոց ցեղասպանության 100–ամյակի տարում ներկայացված գրքերի գրեթե կեսը նվիրված է այս թեմային։ Մենք շեշտը դրել ենք նրա վրա, որպեսզի ձեռք բերենք աշխարհում այս թեմայով հրատարակված բոլոր գրքերը»,– ասաց Տեր–Վարդանյանը։
Ցուցադրությունը կտևի մինչև սեպտեմբերի 26–ը։ Կազմակերպիչներն են Հայաստանի Ազգային գրադարանը` մշակույթի նախարարության աջակցությամբ և Հայոց ցեղասպանության 100–ամյակին նվիրված միջոցառումների համակարգման պետական հանձնաժողովը ։
Երևանում ArmBookExpo առաջին ցուցահանդեսը տեղի է ունեցել 2012թ.–ին, երբ Երևանը հայտարարվել է Գրքի համաշխարհային մայրաքաղաք։
