Վերլուծաբան. Volkswagen–ի հետ կապված սկանդալն ընտանիքների դիմակայություն է հիշեցնում

ԵՐԵՎԱՆ, 23 սեպտեմբերի – Sputnik. «Ավտոստատ» վերլուծական գործակալության գործընկեր Իգոր Մորժարետոն չի բացառում, որ Volkswagen կոնցեռնի շուրջ բռնկված սկանդալը կոնցեռնի մրցակիցների «ձեռքի գործն» է։

Տասնյակ հազարավոր ավտոմեքենաների հետկանչումն ու ընկերության ղեկավարի հրաժարականը գերմանական Volkswagen ավտոկոնցեռնի անհաջողությունների միայն սկիզբն է։ ԱՄՆ–ում բնապահպանական թեստերի կեղծման շուրջ բռնկված սկանդալը կարող է անցնել նաև այլ երկրներ։ Իր սեփական հետաքննությունն են սկսել նաև Հարավային Կորեայում, Ավստրալիայում և Իտալիայում։ Ֆրանսիան պահանջել է, որ «Դիզելգեյթով» ԵՄ–ում զբաղվեն ամենաբարձր մակարդակով։

Գերմանական կոնցեռնին մեղադրում են ավտոարտանետումների հետ կապված շահարկումների համար։ Դրա գործողությունները խախտել են ԱՄՆ–ում օդի մաքրության մասին օրենքի երկու կետ։ Արդյունքում Volkswagen–ին սպառնում է մինչև 37.5 հազար դոլարի տուգանք յուրաքանչյուր վաճառված ավտոմեքենայի համար, ինչն ընդհանուր առմամբ կարող է կազմել ռեկորդային 18 մլրդ դոլար։

«Այդ ամենը շատ նման է ընտանիքների դիմակայության տարրի, ոչ այդքան արդար մրցակցային պայքարի։ Այժմ բոլորի մոտ էլ կարելի է գտնել բնապահպանական ինչ–որ թերացումներ։ Ներկայիս բնապահպանների բոլոր պահանջներին համապատասխանող ավտոմեքենա պատրաստելը պարզապես անհնար է։ Կամ այնքան թանկ, որ հասանելի չի լինի շարքային սպառողին»,– ասել է Իգոր Մորժարետոն Sputnik ռադիոյի եթերում։

Սակայն, ըստ նրա, Volkswagen–ը բավարար ուժեր և հնարավորություններ ունի այս անհաջողությունը հաղթահարելու համար։

«Ի վերջո, դա ողբերգություն չէ։ Արդեն եղել են այսպիսի բաներ, օրինակ, Toyota–ի հետ կապված։ Իսկ կավարտվի նրանով, որ ընկերությունը փոխզիջման կգա ամերիկյան կառավարության հետ։ Վճարումների գումարը 18 մլրդ–ից ավելի չի լինի` դա արդեն «չափից դուրս է»։ Սա ընկերության, ինչպես հասկացա, երկու տարվա եկամուտն է։ Այն ընկերությունից հանելուց հետո կարելի է կոնցեռնը փակել։ Իսկ փակել ոչ ոք չի ցանկանում։ Նույնիսկ մրցակիցները։ Դրա համար մի գումար կհորինեն, որը շահավետ կլինի բոլոր կողմերի համար։ Եվ մի քանի տարի անց դա կմոռանան։ Երկու տարի առաջ Toyota–ի հետ կապված աղմկոտ սկանդալ էր բռնկվել։ Բայց ինչ–որ վճարումների մասին պայմանավորվածություն ձեռք բերեցին։ Բայց Toyota–ն էլ առաջվա պես մնում է թիվ մեկն աշխարհում։ Միայն այս տարի նրանից Volkswagen–ն առաջ է անցել վաճառքների ծավալներով»,– նշել է վերլուծաբանը։

Այս սկանդալից հիմնական շահ ունեցողները, ըստ նրա, Ասիայում են։

«Այս իրավիճակում շահում են, նախևառաջ, Հարավային Կորեայի և Ճապոնիայի ավտոարտադրողները։ Ինչ վերաբերում է Volkswagen–ին, ապա եվրոպական և չինական շուկաներում դրա վաճառքները, ամենայն հավանականությամբ, կմնան նույն մակարդակում։ Իսկ ամերիկյանում կարող են կրճատվել։ Ընդհանուր առմամբ, ընկերությունը վնաս կրում է, բայց դա այդքան էլ սարսափելի չէ։ Այն շատ մեծ և լուրջ հիմնարկ է առաջին իսկ հարվածից փլուզվելու համար»,– ասել է Իգոր Մորժարետոն։