«Ջունա» սերիալի գլխավոր դերակատարը Էդմոն Քյոսայանի թոռնուհին է

ԵՐԵՎԱՆ, 23 սեպտեմբերի– Sputnik. Անվանի ռեժիսոր Էդմոն Քյոսայանի թոռնուհին` դերասանուհի Լաուրա Քյոսայանը «Ջունա» սերիալի գլխավոր հերոսուհին է։ Նա պատմել է, թե ինչպես է անձամբ Ջունան արձագանքել դերասանուհու կատարած աշխատանքին, գրում է «Կոմսոմոլսկայա պրավդա» թերթը։

«Ես տասնյակ փորձեր եմ անցնել, մինչև իմ թեկնածությունը հաստատվեց։ Մինչ այդ շուրջ երկու ամիս ուսումնասիրում էի Ջունայի հետ կապված բոլոր հասանելի նյութերը»,– հիշում է դերասանուհին։

Քյոսայանի խոսքով` առաջին սերիայի սցենարն ընթերցել է մի շնչով։

«Իմ առջև խնդիր էր դրված` էկրանին չկրկնել Ջունայի կյանքի բոլոր նշանակալի պահերը, այլ փորձել հասկանալ, հայացք նետել նրա անցած ուղու վրա։ Մենք փորձել ենք ֆիլմը հագեցնել փիլիսոփայությամբ և մտածել, թե ինչու են մարդկանց հետ անսովոր բաներ տեղի ունենում, ինչու են նրանք տառապում»,– նշել է Քյոսայանը։

Նա ավելացրել է, որ մի քանի անգամ գնացել է Ջունայի գրասենյակ (նկարահանումներն իրականացվել են 2014թ.–ին, իսկ Ջունան մահացել է 2015թ.–ի ամռանը) և տեսել, թե ինչպես է հայտնի բժիշկ– էքստրասենսն օգնել ոչ միայն փող ունեցող մարդկանց, այլև` աղքատներին։

«Ես տեսել եմ, թե ինչպես են մարդիկ փոխվում։ Նա, ով լուրջ հիվանդություն ուներ, սկսում էր ավելի լավ զգալ երկու շաբաթ անց։ Ջունան ինձ ժպտաց. դա կարևոր էր։ Նա ցանկանում էր, որ մենք նրա պատմությունը պատմենք սիրով, գեղեցիկ և հավաստի։ Ես խոստացա, որ հնարավոր ամեն ինչ կանեմ դրա համար։ Նա ասաց` տեսնենք»,– ասել է դերասանուհին։

Քյոսայանը նշել է, որ Ջունայի հետ հանդիպումից հետո սկսվել է ավելի ուշադիր վերաբերվել իրեն և աշխարհին, ուշադրություն է դարձնում այնպիսի բաների վրա, որոնք նախկինում չի կարևորել։

«Դուք չե՞ք նկատել, եթե սկսում եք լսել ձեր ներքին ձայնը, սկսում են տարօրինակ բաներ կատարվել։ Օրինակ` ցանկանում ես ստանալ քեզ հուզող հարցի պատասխանը, և այն որոշ ժամանակ անց գալիս է։ Ներսից, թե տիեզերքից, կարևոր չէ։ Մարդը և տիեզերքը կենդանի օրգանիզմներ են, նրանք անընդհատ խոսում են։ Եվ ամենուրեք նշաններ կան, եթե ուշադիր լինես»,– ասել է դերասանուհին։

Ջունան մեծ համբավ ձեռք բերեց խորհրդային ժամանակաշրջանում: Նրա օգնությանն են դիմել Լեոնիդ Բրեժնևը, Իլյա Անդրոպովը, Կոնստանտին Չեռնենկոն, նկարիչ Իլյա Գլազունովը, դերասաններ Ռոբերտ դե Նիրոն ու Մարչելլո Մաստրոյանին, ինչպես նաև կինոռեժիսորներ Անդրեյ Տարկովսկին ու Ֆեդերիկո Ֆելինին:

Անցած տարի Ռուսաստանի Առաջին ալիքը սկսել է Ջունայի կյանքի մասին հեռուստասերիալի նկարահանումները։ Նա անձամբ հավանություն է տվել և օրհնել իր մասին ֆիլմ ստեղծողներին։