ԵՐԵՎԱՆ, 22 սեպտեմբերի–Sputnik. Forbes–ը հրապարակել է աշխարհում ամենաբարձր վարձատրություն ունեցող մոդելների ցանկը, որը գլխավորել է Ժիզել Բյունդխենը։ Նա 9–րդ անգամ է գլխավորում Forbes ամսագրի կազմած ամենաբարձր վարձատրվող մոդելների ցանկը` առաջ անցնելով Կառա Դելևինից, Միրանդա Քերից, Ալեսանդրա Ամբրոսիոյից, Քենդիս Սուեյնփոուլից, Նատալյա Վոդյանովայից, Քեյթ Մոսից և ցանկում առաջին անգամ ներառված Քենդալ Ջեններից։
Վարկանիշի մասնակիցները տարվա ընթացքում ընդհանուր առմամբ վաստակել են 147 մլն դոլար։
Ժիզել Բյունդխեն, 44 մլն դոլար
35–ամյա Ժիզել Բյունդխենի (Gisele Bündchen) հոնորարների ընդհանուր գումարը, 2014թ.–ի համեմատ, նվազել է 3 մլն դոլարով, սակայն դա չի խանգարել բրազիլուհուն 9–րդ անգամ գլխավորել Forbes ամսագրի վարկանիշը և հետևում թողնել մյուս գեղեցկուհիներին։ Եկամտի հիմնական աղբյուր են դարձել Chanel, Carolina Herrera և Under Armour ընկերությունների հետ կնքած պայմանագրերը, Emilio Pucci–ի, Stuart Weitzman–ի և Balenciaga–ի գովազդային արշավներին մասնակցելը։ Բյունդխենի ֆեյսբուքյան էջին հետևում է 5,5 մլն օգտատեր, 6 մլն օգտատեր էլ` Ինստագրամի էջին։ Հայրենիքում Բյունդխենը հիմնել է ներքնազգեստի սեփական ապրանքանիշը, որը կոչվում է Gisele Bundchen Intimates։ 2015թ.–ի գարնանը Բյունդխենն ավարտել է հագուստներ ներկայացնող մոդելի կարիերան և ուշադրությունը կենտրոնացրել լուսանկարահանումների վրա։
Կառա Դելևին, 9 մլն դոլար
23–ամյա բրիտանացի մոդել Կառա Դելևինը (Cara Delevingne) Forbes–ի ցանկում առաջին անգամ հայտնվել է 2014թ.–ին և մեկ տարվա ընթացքում հայտնվել երկրորդ հորիզոնականում` գրեթե եռակի ավելացնելով իր հոնորարները։ Դելևինը համագործակցել է Chanel–ի, YSL–ի, Burberry–ի և ևս տասը ապրանքանիշների հետ, հանդես է եկել գլխավոր դերում «Թղթե քաղաքներ» (Paper Towns) դրամայում։ Պատրաստվում է ներկայացնել «Լոնդոնյան դաշտեր» (London Fields), «Փեն. ճանապարհորդություն դեպի Նետլանդիա» (Pan), «Սիրահարված երեխաներ» (Kids in Love), «Վարդակակաչի տենդ» (Tulip Fever) և «Ինքնասպանների ջոկատ» (Suicide Squad) ֆիլմերը։ Instagram–ում Դելևինի էջին հետևում է մոտ 20 մլն օգտատեր։
Ադրիանա Լիմա, 9 մլն դոլար
34–ամյա բրազիլուհի Ադրիանա Լիման (Adriana Lima) Victoria’s Secret–ի «հրեշտակներից» է։ Ադրիանայի կնքած պայմանագրերի շարքում են Marc Jacobs–ի, H&M–ի, Vogue Eyewear–ի, Balmain–ի, Desigual–ի գովազդային արշավներն ու նկարահանումները Pirelli 2015 օրացույցի համար։
Դաութցեն Քրեզ
30–ամյա նիդեռլանդացի սուպերմոդել Դաութցեն Քրեզը (Doutzen Kroes) 2014թ.–ի ամռանը դուստր է ունեցել` Միլենային, ինչը խանգարել է շարունակել հարաբերությունները Victoria’s Secret–ի հետ։ Արագ վերականգնելով մարմնի կազմվածքը` Դաութցենը շահավետ պայմանագիր է կնքել L’Oréal Paris–ի հետ, նկարահանվել Tiffany & Co.–ի, H&M–ի, Mercedes-Benz–ի համար։ Քրեզը հիմնադրել է Repeat Cashmere հագուստի շարքը։
Նատալյա Վոդյանովա, 7 մլն դոլար
33–ամյա ռուս մոդել Նատալյա Վոդյանովան մեկ տարում երեք մլն դոլարով ավելացրել է իմ եկամուտը և Calvin Klein–ի, Guerlain–ի, Etam–ի, Stella McCartney–ի և Theory–ի հետ կնքած պայմանագրերի շնորհիվ վարկանիշում 10–րդ հորիզոնականից բարձրացել է 5–րդ հորիզոնական։ Վոդյանովան շարունակում է միջոցներ ներգրավել «Մերկ սրտեր» հիմնադրամի նախագծերի համար։
Միրանդա Քեր, 5,5 մլն դոլար
32–ամյա մոդել Միրանդա Քերը (Miranda Kerr) հանդիպում է աշխարհի ամենաերիտասարդ միլիարդատիրոջ` Snapchat–ի 25–ամյա հիմնադիր Էվան Շպիգելի (Evan Spiegel) հետ։ Քերը Forbes–ի վարկանիշում զբաղեցնում է 6–րդ տեղը Wonderbra–ի և Swarovski–ի հետ կնքած պայմանագրերի շնորհիվ։ Ոսկերչական ապրանքանիշի համար Քերը ստեղծել է զարդերի սեփական շարքը։
Ջոան Սմոլս, 5,5 մլն դոլար
2015թ.–ին 27–ամյա պոերտորիկուհի Ջոան Սմոլսը (Joan Smalls) նկարահանվել է Calvin Klein–ի, Marc Javobs–ի, H&M–ի, Estée Lauder–ի գովազդային արշավներում և կրկնապատկել իր եկամուտը։
Լառա Սթոուն, 5 մլն դոլար
Լառա Սթոունը (Lara Stone) Calvin Klein ապրանքանիշի մուսան է։ Նա մեկ տարվա բացակայությունից հետո «վերադարձել» է Forbes–ի վարկանիշ։ Սթոունը վարկանիշի առաջին տասնյակում է հայտնվել L'Oréal Paris–ի հետ կնքած պայմանագրի և Versace–ի, Calvin Klein–ի, Donna Karan–ի, Prada–ի համար իրականացված նկարահանումների շնորհիվ։
Ալեսանդրա Ամբրոսիո, 5 մլն դոլար
Victoria's Secret–ի «հրեշտակ» Ալեսանդրա Ամբրոսիոն (Alessandra Ambrosio) նկարահանվում է Schutz–ի և Dafiti–ի համար, թողարկում է Ale by Alessandra Ambrosio լողազգեստների սեփական շարքն ու Planet Blu ապրանքանիշի հետ հագուստի համատեղ շարքը։ 2015թ.–ին 34–ամյա մոդելն առաջին անգամ նկարահանվել է կինոյում։ «Բամբասկոտը» (Gossip Girl), «Գեղեցիկները» (Entourage) սերիալներում և ««Ռոյալ» խաղատուն» (Casino Royale) ֆիլմում խաղացած փոքրիկ դերերից հետո Ալեսանդրան համաձայնել է նկարահանվել «Նինձյա կրիաները 2» (Teenage Mutant Ninja Turtles 2) կոմիքսների հիման վրա նկարահանվող ֆանտաստիկ ֆիլմում։
Քենդիս Սուեյնփոուլ, 5 մլն դոլար
26–ամյա հարավաֆրիկացի մոդել և Victoria’s Secret –ի «հրեշտակ» Քենդիս Սուեյնփոուլի (Candice Swanepoel) անունը Forbes–ի կազմած ցանկում է 2011թ.–ից։ Max Factor–ի և Biotherm ֆրանսիական ապրանքանիշի «դեմքը» նկարահանվում է Osmoze Jeans–ի, Free People–ի և Givenchy–ի գովազդային արշավներում։
Քարլի Քլոս
Forbes–ի առաջին քսանյակում են հայտնվել 23–ամյա Քարլի Քլոսը (Karlie Kloss, 5 մլն դոլար)` Kode with Karlie սոցիալական նախագծով և L'Oréal–ի, Joe Fresh–ի, Kate Spade–ի և Chanel–ի հետ կնքած պայմանագրերով, Estée Lauder–ի և Oscar de la Renta–ի «դեմք» հանդիսացող 40–ամյա Քերոլին Մերֆին (Carolyn Murphy, 4,5 մլն դոլար), ինչպես նաև Հիլարի Ռոդան (Hilary Rhoda), Քեյթ Ափթոնը (Kate Apton), Ջորդան Դանը (Jourdan Dunn), Անյա Ռուբիկը (Anja Rubik) և Էդիտա Վիլկևիչուտեն (Edita Vilkeviciute), ովքեր վաստակել են 3,5 միլիոնական դոլար։
41–ամյա Քեյթ Մոսը (Kate Moss) Մեծ Բրիտանիայի ամենապահանջված մոդելն է, սակայն նրա եկամուտը նվազել է` 7 մլն դոլարից հասնելով 4,5 մլն դոլարի։ Մոսը շարունակում է համագործակցել Rimmel–ի, Burberry–ի և Topshop–ի հետ, որի համար նա հագուստի շարք է ստեղծում։
Քիմ Քարդաշյանի 19–ամյա քրոջ` Քենդալ Ջենների (Kendall Jenner) անունն առաջին անգամ է ներառվել ցանկում։ Գեղեցկուհին զբաղեցրել է 16–րդ տեղը` իր վաստակած 4 մլն դոլարով, որոնք նա ստացել է Estée Lauder–ի, Calvin Klein–ի, Fendi–ի, Marc Jacobs–ի հետ կնքած պայմանագրերի շնորհիվ և դարձել է Forbes–ի ցանկում հայտնված ամենաերիտասարդ մոդելը։ Ջենները Instagram–ում օգտատերերի թվով առաջատարն է` ավելի քան 37 մլն։
