ԵՐԵՎԱՆ, 22 սեպտեմբերի– Sputnik. Սիրիայից գաղթող փախստականների զանգվածային հոսքը կանխելու համար փախստականներին ժամանակավորապես տեղաբաշխելու նպատակով Թուրքիան լրացուցիչ ֆինանսական օգնություն կստանա Եվրոպական միությունից։
Եվրամիությունից օգնություն կստանան նաև Լիբանանը և Հորդանանը։
«Սպասվում է, որ որոշում կընդունվի Թուրքիային, Լիբանանին և Հորդանանին տրամադրվող ֆինանսական օգնությունն ավելացնելու մասին»,– ասել է աղբյուրը` չնշելով գումարների չափը։
Եվրամիության 28 երկրների ՆԳՆ ղեկավարները երեքշաբթի Բրյուսելում արտահերթ նիստ կանցկացնեն, որպեսզի քննարկեն Եվրահանձնաժողովի առաջարկը` Մերձավոր Արևելքի և Աֆրիկայի երկրներից Եվրամիության տարածքներ 120 հազար փախստականների տեղաբաշխման մասին։
Ինչպես հաղորդել է ՌԻԱ Նովոստին` հղում անելով եվրոպական դիվանագիտական աղբյուրներին, ԵՄ երկրներում 120 հազար փախստականների տեղաբաշխումը կկատարվի կամավոր հիմունքներով, պարտադիր քվոտաներ չեն լինի. դա նախկինի պես պնդում են Հունգարիան, Չեխիան, Սլովակիան և Ռումինիան։
Ավելի վաղ ԵՄ երկրների ներքին գործերի նախարարները կարողացել են պայմանավորվել մինչև 40 հազար փախստականներ ընդունելու մասին, որոնք գտնվում են Իտալիայում և Հունաստանում։ Այս անգամ Եվրահանձնաժողովը միգրանտների չդադարող հոսքի ֆոնին առաջարկել է ավելացնել այդ թիվը չորս անգամ` հասցնելով 160 հազարի։
ԶԼՄ. Թուրքիան փախստականների համար ֆինանսական օգնություն կստանա ԵՄ–ից
© Sputnik / Александр Юрьев
/ Բաժանորդագրվել
ԵՄ խորհրդի աղբյուրը հայտնել է, որ Եվրամիությունը կավելացնի Թուրքիային, Լիբանանին և Հորդանանին տրվող ֆինանսական օգնությունը
