Դմիտրի Խվորոստովսկին Մոսկվայում հոկտեմբերի վերջին բացառիկ համերգ կունենա

ԵՐԵՎԱՆ, 22 սեպտեմբերի – Sputnik. Դմիտրի Խվորոստովսկին Կրեմլի պետական պալատում կայանալիք համերգին կներկայացնի հայտնի երչուհի Էլինա Գարանչին, հայտնել է ՌԴ նախագահի գործերի վարչության մամուլի քարտուղար Վիկտոր Խրեկովը։

Նրա խոսքերով` «Խվորոստովսկին և ընկերներ» շարքի այս համերգը կկայանա հոկտեմբերի 29-ին, այս միջոցառումը ներառված է երկրի գլխավոր համերգասրահի երկացանկում։ Նա հիշեցրել է, որ այսպիսի համերգները բացառիկ նախագիծ են օպերայի սիրահարների համար` համաշխարհային մեծության աստղերի հետ ծանոթանալու առումով։ Խրեկովն ավելացրել է, որ համերգին կմասնակցի Մոսկվայի «Նոր օպերա» թատրոնի նվագախումբը` դիրիժոր Կոնստանտին Օրբելյանի ղեկավարությամբ։

Ավելի վաղ Խվորոստովսկին հայտնել էր, որ բժիշկների ախտորոշած գլխուղեղի քաղցկեղի պատճառով մինչև օգոստոսի վերջ չեղյալ է հայտարարում բոլոր համերգները։ Սեպտեմբերի սկզբին հայտնել էին, որ Խվորոստովսկին բեմ է վերադառնալու սեպտեմբերին և մասնակցելու է Ջուզեպե Վերդիի «Տրուբադուր» օպերայի երեք բեմադրություններին Նյու Յորքի Մետրոպոլիտեն օպերայում։