Հարցում. ռուսաստանցիների ավելի քան 40%-ը կողմ է Ղարաբաղի անկախության ճանաչմանը

ԵՐԵՎԱՆ, 21 սեպտեմբերի – Sputnik. Ռուսական «Լևադա կենտրոնի» անցկացրած հարցման մասնակիցների կեսը կողմ է Լեռնային Ղարաբաղի անկախության ճանաչմանը:

Հարցումն անցկացվել է 2015 թվականի օգոստոսի 21-24-ը` համառուսաստանյան ներկայացուցչական ընտրանքի քաղաքային և գյուղական բնակչության 18 և բարձր տարիքային խմբի շուրջ 800 անձանց շրջանում` Ռուսաստանի 46 տարածաշրջանների 134 բնակեցված վայրերում:

Այսպես, ուսումնասիրության համաձայն, հարցվածների 42%-ը, կողմ է, որպեսզի Լեռնային Ղարաբաղը դառնա անկախ պետություն:

ԼՂՀ-ի Հայաստանի և Ադրբեջանի կազմի մեջ մտնելու վերաբերյալ ռուսատսնցիների կարծիքները շատ չեն տարբերվել` 9%-ը կարծիք է հայտնել, որ ԼՂՀ-ն պետք է միանա Հայաստանին, 10%` որ Ադրբեջանին:

«Լևադա կենտրոնը» հարցումն անցկացրել է անհատական հարցազրույցների տեսքով հարցվողների տներում: Այս հետազոտության վիճակագրական անհամապատասխանելիությունը չի գերազանցում 4,1%.ը:

Այդ թվում հարցվածների 39%-ը դժվարացել է պատասխանել այս հարցին:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։