Հայաստանը զեկույց կներկայացնի ՀԱՊԿ–ին հումանիտար արձագանքման կենտրոնի մասին

ԵՐԵՎԱՆ, 21 սեպտեմբերի– Sputnik. Հայաստանը ՀԱՊԿ երկրների Արտակարգ իրավիճակների համակարգող խորհրդի նիստի ընթացքում զեկույց կներկայացնի Հումանիտար արձագանքման հայ–ռուսական կենտրոնի ստեղծման գործընթացի մասին, երկուշաբթի տեղեկացրել է ՀԱՊԿ քարտուղարության մամուլի քարտուղար Վլադիմիր Զայնետդինովը։

Նրա խոսքով` նիստը տեղի կունենա սեպտեմբերի 22–ին Սոչիում` Ղազախստանի Հանրպաետույան ՆԳ փոխնախարար Վլադիմիր Բոժկոյի գլխավորությամբ։

Նիստին կմասնակցի և ելույթ կունենա ՀԱՊԿ գլխավոր քարտուղար Նիկոլայ Բորդյուժան։ Նա կներկայացնի սեպտեմբերի 15–ին Դուշանբեում կայացած ՀԱՊԿ Հավաքական անվտանգության խորհրդի նստաշրջանի արդյունքները։

Կներկայացվի նաև զեկույց Զորավարժությունների ծրագրի իրականացման և արտակարգ իրավիճակների կանխարգելման և չեզոքացման ոլորտում ՀԱՊԿ անդամ պետությունների լիազորված մարմինների փոխգործակցության մշակմանն ուղղված համատեղ միջոցառումների մասին։

Արտակարգ իրավիճակների համակարգող խորհրդի նիստի ժամանակ կքննարկվեն ՀԱՊԿ անդամ պետությունների իրավապահ, հրշեջ, վթարային–փրկարարական մարմինների և հատուկ ծառայությունների համար կադրերի պատրաստման համաձայնագրի իրականացման հարցերը, որոնք վերաբերում են Ռուսաստանի ԱԻՆ–ի բարձրագույն ուսումնական հաստատություններում արտոնյալ հիմունքներով ուսում ստանալուն։ Նիստի ժամանակ կքննարկվի նաև արտակարգ իրավիճակների ՀԱՊԿ անդամ պետությունների արձագանքման կարգի մասին դրույթի իրականացման մեխանիզմի նախագիծը։

Նիստի մասնակիցները կքննարկեն նաև ՀԱՊԿ անդամ պետությունների միասնական տեղեկատվական տարածքի գործարկումը, արտակարգ իրավիճակից տուժած պետություն ՀԱՊԿ համակարգողների գործուղման դրույթի նախագիծն ու «Աստանա. Ժայռոտ քաղաք» բազային հրաձգարանի ուսումնական ներուժի օգտագործումը, որը վերաբերում է ՀԱՊԿ անդամ պետությունների փրկարար ստորաբաժանումների պատրաստմանը։

ՀԱՊԿ–ը ստեղծվել է 1992 թ.–ի մայիսի 15–ին ստորագրված Հավաքական անվտանգության պայմանագրի հիման վրա ԱՊՀ անդամ երկրների կողմից։ ՀԱՊԿ–ի մասնակիցներն են Հայաստանը, Բելառուսը, Ղազախստանը, Ղրղըզստանը, Ռուսաստանն ու Տաջիկստանը։