Քաղաքագետ.Անկախության ամենամեծ ձեռքբերումներից մեկը՝ տարածքների վերականգնում է

ԵՐԵՎԱՆ, 21 սեպտեմբերի – Sputnik. Հայաստանի անկախության ամենամեծ ձեռքբերումները՝ հայկական բանակն ու տարածքների վերականգնում են: Սա բացառիիկ դեպք է, երբ հայրենի տարածքի մի մասը նաև ազատագրվում է: «Sputnik-Արմենիա» ռադիոկայանի հետ զրույցում այս մասին ասել է է քաղաքագիտության դոկտոր, պրոֆեսոր Լևոն Շիրինյանը:

Բանախոսը նկատում է՝ անկախությունը տվել է նաև նոր սերունդ, որը չի տեսել օտարի իշխանություն: «Բայց այդ անկախության խողովակը պետք է լցվի բովանդակությամբ, որպեսզի չառաջանան խնդիրներ, որովհետև մենք նաև կորուստներ ենք ունեցել՝ հաճախ անիմաստ և սուբյեկտիվ պատճառներով»,-նշել է նա:

Քաղաքագետն ընդգծում է, որ այս անկախությունը, փաստորեն, անկախության վերականգնում էր՝ 1918 թվականի մայիսի 28-ին ձեռք բերված առաջին հանրապետության: Ավելին, Շիրինյանը ճիշտ է համարում Հայաստանի չորրորդ հանրապետության հիմնումը:

«Ճիշտ կլիներ, որ հիմա հիմնադրվեր չորրորդ հանրապետությունը, որի խնդիրը լիներ պետությանն ազգային բովանդակություն հաղորդելը, որը կնշանակեր արդյունաբերության, գիտության վերականգնում, մշակույթի վերազարթոնք: Այդպես եղել է նաև Ֆրանսիայում. նրանք տեսան ճգնաժամ է, հարցը լուծեցին նման կարգով: Կարծում եմ, չորրորդ հանարապետության հիմնադրման հարցն օրակարգային է: Այն պետք է կապերը պահի այս անցած քսանչորս տարիների հետ, բայց պետք է լինի ազգային պետության հիմնադրում՝ հողահավաք, հայրենահավաք, ժողովրդահավաք: Սրանք ռազմավարական գլխավոր հարցերն են, որոնք չենք լուծել, բայց պետք է լուծենք»,-իր տեսակետն է հստակեցրել քաղաքագետը:

Մեզանում շատ է խոսվում, որ հանրությունը իրեն չի համարում երկրի իրական տերը: Քաղաքագիտության տեսանկյունից՝ սա ի՞նչ վտանգներ է պարունակում: Այս հարցին ի պատասխան՝ Շիրինյանն ընդգծում է՝ հայրենիքին տեր չզգալն անվտանգության հարց է:

«Դա նշանակում է, որ տնտեսական, սոցիալական, քաղաքական համակարգը պետք է վերափոխվի, այստեղ ժողովրդին մեղադրելն անհեթեթություն է, որովհետև այդ ժողովուրդն ազատության ձգտման պատճառով է ենթարկվել ցեղասպանության: Հիմա, եթե ժողովուրդն իրեն լավ չի զգում, ապա նշանակում է, որ պետական կառույցն է սխալ է, ոչ թե ժողովուրդը: Ժողովուրդը սխալ չի լինում»,-շեշտադրել է բանախոսը:

Այս իրավիճակի լուծումը, ըստ Շիրինյանի, իր նշած չորրորդ հանրապետության հիմնադրումն է, որը կլինի ազգային, սոցիալական, իրավական պետություն, որտեղ դատարաններն անկախ կլինեն, կբացառվի ընտրակեղծիքն ու կաշառակերությունը, և մարդն իրեն կզգա պետության իսկական տերը: «Եթե այս ամենը չկա, նշանակում է, որ պետությունը մտածելու շատ տեղ ունի»,-նկատել է քաղաքագետը: