ԵՐԵՎԱՆ, 21 սեպտեմբերի – Sputnik. Թվում է թե, սեպտեմբերին երևանցիներն ու մայրաքաղաքի հյուրերը արդեն պետք է հագեցած լինեին ջազ երաժշտությունից: Սակայն` ոչ…. Հայտնի «Գոլոս» հեռուստաշոուին մասնակցած հայ կատարողների մասնակցությամբ Jazz Parking Yerevan նախագիծը լեփ-լեցուն դահլիճ էր հավաքել Սպենդիարյանի անվան օպերայի և բալետի ազգային ակադեմիական թատրոնում:
Եվ դա զարմանալի չէ, չէ որ համերգային ծրագրին պետք է մասնակցեին Մարիամ և Արմեն Մերաբովները, Մարգարիտա Պոզոյանը, Արծվիկը, Լիա Սարգսյանը, Հայկ Մովսիսյանը (Music Hayk), Էդվարդ Խաչատրյանը, Արտյոմ Կաչարյանը և ուրիշները: Եվ նույնիսկ այն փաստը, որ համերգը որոշ տեխնիկական պատճառներով մեկ ժամ ուշ սկսվեց և ոչ բոլոր կատարումները կարելի է դասակարգել, որպես ջազ, չնվազեցրեց հանդիսատեսի հիացմունքն ու ոգևորությունը:
Համերգի կազմակերպիչ և վարող Անժելիկա Ալֆյորովա-Հարությունյանը` ներողություն խնդրելով, պատմեց այն մասին, որ սիրելի Հայաստանի համար համերգի ծրագիրը մշակվում էր կես տարի: Ծագումով հայ որոշ երաժիշտներ հենց նախագծի շրջանակում առաջին անգամ այցելեցին պատմական հայրենիք:
Համերգի մասնակիցները մեծ պատիվ համարեցին ելույթ ունենալ օպերայի և բալետի թատրոնի բեմում այսպիսի պատմական իրադարձության` Հայաստանի Անկախության 24-րդ տարեդարձի նախօրեին, և հայրենակիցներին շնորհավորել այս տոնի կապակցությամբ:
Sputnik Արմենիա պորտալը միանում է շնորհավորանքներին և հույս հայտնում, որ ջազի աշխարհում վերջին վառ իրադարձությունները հիմք կհանդիսանան Հայաստանում ջազի հարուստ ավանդույթների վերածննդի համար, իսկ Երևանը`, որը համարվում էր ԽՍՀՄ ջազի մայրաքաղաք, կշարունակի ջազի ոճում նորաձևություն թելադրել:
