ԵՐԵՎԱՆ, 20 սեպտեմբերի – Sputnik. Սեպտեմբերի 20-ի լույս 21-ի գիշերը աշխարհում նշում են ամենատարօրինակ բնապահպանական տոներից մեկը՝ Չղջիկների գիշերը, հայտնում է Calend.ru-ն։
Տոնի հիմնական նպատակն է հասարակության ուշադրությունը դարձնել չղջիկների պաշտպանության խնդիրներին, ինչպես նաև ցրել այն միֆը, որի պատճառով շատ մարդիկ սնահավատորեն են վերաբերվում և վախենում են այդ կենդանիներից՝ համարելով նրանց վամպիրներ:
Իրականում չղջիկները յուրահատուկ կաթնասուններ են, որոնք իրենց կառուցվածքի շնորհիվ յուրացրել են թռիչքի արվեստը։ Կենդանու թևերը պահում են առջևի ուժեղ զարգացած վերջույթների 4 երկար մատները։ Գլխի չափ ունեցող երկար նեղ պոչը պատված է թաղանթով։ Հետին վերջույթների զարգացած մագիլներով մատներն ազատ են թաղանթից, դրանցով չղջիկները կառչում են ծառի ճյուղերից և գլխիվայր կախվում։
Այն, որ չղջիկներ գիշերային կյանք են վարում, իր ուրույն բացատրությունն ունի: Նրանց տեսողությունը թույլ է զարգացած և հարմարեցված է միայն մթությանը: Սակայն չղջիկների մոտ, դրա փոխարեն, շատ լավ զարգացած են լսողությունն ու հոտառությունը, ինչը նրանց օգնում է որս անել և կողմնորոշվել տարածության մեջ, ինչպես նաև չղջիկները օժտված են յուրահատուկ ունակությամբ, որոնցով, նրանցից բացի օժտված են միայն դելֆինները` նրանք կարողանում են որոշել ծովի խորությունը:
