ԵՐԵՎԱՆ, 20 սեպտեմբերի – Sputnik. Ամփոփվել են Անապայում անցկացվող ԱՊՀ և Բալթյան երկրների «Կինոշոկ 2015» XXIV կինոփառատոնի կարճամետրաժ ֆիլմերի մրցույթի արդյունքները:
Մրցույթին մասնակցել են 15 աշխատանքներ` Ռուսաստանից, Ուկրաինայից, Լատվիայից, Հայաստանից և Լեհաստանից:
Ժյուրին գլխավոր մրցանակը շնորհել է ռուս ռեժիսոր Նիկիտա Իկոննիկովի «Տանյա» ֆիլմին: Ֆիլմում պատմվում է ողբերգական պատմություն, որը տեղի է ունենում ռուսական գյուղերից մեկում` հյուսիսային բնապատկերի ֆոնին: Մոսկվայից գյուղ է գալիս մի նկարիչ իր ընտանիքով, իսկ տեղի բնակիչ Տանյան համաձայնվում է դառնալ նկարչի բնորդուհին: Այս որոշումը հոր և որդու միջև բախումների առիթ է դառնում և ավարտվում ողբերգությամբ:
Հոգեբանական ճշգրիտ երկխոսությունների համար ժյուրիի հատուկ մրցանակին է արժանացել ուկրաինացի ռեժիսոր Եկատերինա Գորնոստայի «Որոշ հեռավորության վրա» ժապավենը: 11-րոպեանոց ֆիլմը պատմում է երկու սիրահարների պատմությունը: Ժյուրին գնահատել է պատմության հոգեբանական անկեղծությունն ու ազնվությունը, որը համակված է լուսավոր մելամաղձոտությամբ:
Տղամարդու լավագույն կերպարը ստեղծել էին լատվիացի կինոմատոգրաֆիստները «Պա Պա» ֆիլմում: Ռեժիսոր Վալերի Օլեխնոն պատմում է մի կալանավորի պատմություն, ով վերադարձել է բանտից և երկարատև բաժանումից հետո հանդիպել որդուն: Այս հանդիպումը կարող է վերջինը լինել երկուսի համար էլ:
«Արտահայտվելու կարողության» համար հատուկ դիպլոմի է արժանացել ուկրաինական ռեժիսոր Մարինա Վրոդայի «Խխունջներ» ժապավենը: «Խխունջները» դաժան և ինչ որ տեղ շոկային պատմություն է երկու «գոպնիկների» մասին, ովքեր մանկության ընկերներ են:
Ժյուրիի անդամները նշել են, որ այս տարի պատմություններն ավելի դաժան են դարձել: Անկախ բովանդակության դաժանությունից, մրցանակների արժանացած աշխատանքները «սև» կամ սարսափ ֆիլմեր չէին: Նրանք իրենցից ներկայացնում էին, ավելի շուտ, էքստրեմալ պայմաններում հայտնված մարդու զգայական աշխարհի ուսումնասիրություն, փորձ էին հասկանալու մարդու հնարավորությունների սահմանները, փոխըմբռնման, ամենաբարդ իրավիճակներում մարդ մնալու կարողությունը:
