ԵՐԵՎԱՆ, 20 սեպտեմբերի – Sputnik. Մադրիդի «Ռեալի» հարձակվող Քրիշտիանու Ռոնալդուն «Ռեալի» և «Գրանադայի» խաղին դուրս է եկել Սիրիայի փախստականներից մեկի երեխայի հետ, ում հորը հրել էր հունգարացի լրագրողը:
Տղան և նրա հայրը` Օսամա Աբդուլ Մոհսենը, Սիրիայի փախստականներ են: Նրանք հայտնի դարձան այդ տխուր միջադեպից հետո, երբ ընկան հունգարացի լրագրողի ոտքի հարվածից: Այդ տեսանյութը տեսան ամբողջ աշխարհում և հասարակության կողմից այն մեծ արձագանք ստացավ:
Միջադեպից հետո ԶԼՄ-ները հայտնեցին, որ հունգարական N1TV հեռուստաընկերությունը աշխատանքից ազատել է աշխատակցուհուն:
Այդ միջադեպից հետո Օսամա Աբդուլ Մոհսենին առաջարկեցին աշխատել Խատաֆե քաղաքի CENAFE մարզադպրոցում: Մոհսենն անցյալում Դայր էզ Զաուր քաղաքի «Ալ Ֆոտուվա» սիրիական ֆուտբոլային ակումբի մարզիչն է եղել և մինչ օրս Սիրիայի ֆուտբոլային ասոցիացիայի վարչության անդամ է:
2015 թվականի սկզբից ԵՄ–ի տարածք են տեղափոխվել մոտ 500 հազար միգրանտներ, նրանց շարքերն ամեն օր համալրվում են նոր փախստականներով: Եվրահանձնաժողովը հայտարարել է, որ ստեղծված միգրացիոն ճգնաժամը խոշորագույնն է Երկրորդ աշխարհամարտից հետո։
