ԵՐԵՎԱՆ, 20 սեպտեմբերի – Sputnik. Բացօթյա ֆիթնեսի դասընթացները «Եղիր ԱԿՏԻՎ, ապրիր ԱՌՈՂՋ» ծրագրի շրջանակում անցկացվել են կիրակի Երևանի Կիրովի անվան մանկական այգում: Միջոցառմանը մասնակցեցին ամենատարբեր տարիքի ավելի քան 140 մարդ
Ինչպես Sputnik Արմենիա պորտալին հայտնեց կազմակերպիչներից մեկը` Լիդիա Վարդանյանը, սա Կիրովի այգում ֆիթնեսի երկրորդ պարապմունքն էր` առաջին պարապմունքը անցկացվել է սեպտեմբերի 13-ին:
«Եղիր ԱԿՏԻՎ, ապրիր ԱՌՈՂՋ» ծրագրի շրջանակում միջոցառումների շարքը մեկնարկել է օգոստոսի 22-ին Սևանում, որտեղ մենք կազմակերպել էին լողափային վոլեյբոլի մրցումներ: Այնուհետև Երևանի Թումանյանի անվան այգում առաջին անգամ անցկացվեցին անվճար հեծանվային դասեր», — նշեց նա:
Վարդանյանը նաև հայտնեց, որ առջևում նրանք դեռ շատ ծրագրեր ունեն: Երևանի բուհերում կանցկացվեն բասկետբոլի մրցումներ, բացի այդ սեպտեմբերի 26-ին Գյումրիում, իսկ սեպտեմբերի 27-ին Իջևանում սկսնակների համար կազմակերպվելու են հեծանվային անվճար դասընթացներ: Նրա խոսքերով` մասնակցության համար տարիքային սհամանափակում չկա, քանիո ր ծրագրի նպատակն է` առողջ և ակտիվ կենսակերպի քարոզումը:
Վարդանյանը նաև պատմեց, որ հոկտեմբերի 17-ին Երևանի Ազատության հրապարակում կազմակերպվելու է սպորտային մեծ փառատոն, որը մեկնարկելու է հեծանվաերթով: Հեծանվաերթի 500 մասնակիցները պետք է հաղթահարեն 25 կմ հեռավորություն: Այնուհետև հաղթող թիմերի միջև կանցկացվեն բասկետբոլի և վոլեյբոլի եզրափակիչ խաղեր:
Նաև նախատեսվում է անցկացնել մարզական ցուցադրական ելույթներ և հետաքրքիր շոու ծրագիր: Միջոցառումներն իրականացնում են «Coca-Cola» ընկերությունը, «Global Shapers» ՀԿ-ն և «MAROG» կրեատիվ գործակալությունը` Սպորտի և երիտասարդության հարցերով նախարարության «Եղիր ԱԿՏԻՎ, ապրիր ԱՌՈՂՋ» ծրագրի շրջանակում: Ծրագրին աջակցում է Երևանի քաղաքապետարանը:
