ԵՐԵՎԱՆ, 20 սեպտեմբերի – Sputnik. «Գրական Տապան» միջազգային ամենամյա փառատոնը երեքշաբթի մեկնարկում է Երևանում:
«Գրական Տապան»-ի այս տարվա կարգախոսն է «Խոսքը` հանուն կյանքի», քանի որ որևէ հասարակության, հանրության մեջ ապրող գրողը մերօրյա իրականության մարտահրավերներին ամեն օր պատասխանելու, իր ձայնը լսելի ու հասանելի դարձնելու խնդիր ունի
«Գրական Տապան»-ը նպաստում է դրան և մասնակից գրողների համար այդ հարթակի պատվախնդիր դերն է ստանձնում և ավելի քան 40 գրողի համար ստեղծում հարթակ` բարձրաձայնելու հանուն կյանքի, հանուն ճշմարտության, հանուն բարձրորակ գրականության իրենց մտքերը:
Պատահական չէ, որ փառատոնի բացման արարողությունն անցկացվել է բաց երկնքի տակ: Այս ձևաչափը նպատակ ունի առավելագույնս հանրայնացնելու փառատոնը` գրողների շփման այս հարթակը հասանելի դարձնելով հանրության լայն շրջանակների համար:
Փառատոնի այս տարվա մասնակիցներից են ամերիկահայ գրող, վիպասան Քրիս Բոհջալյանը, ռումինահայ գրող և քաղաքական գործիչ Վարուժան Ոսկանյանը, հոլանդացի գրող Յոկե Վան Լեուվենը, չինացի պոետ, թարգմանչուհի Մինգ Դին, իսրայելցի պոետ Ամիր Օրը, իտալացի Կլաուդիո Պոցցանին և այլք:
Փառատոնի շրջանակում, որը տևելու է մինչև սեպտեմբերի 28-ը, կանցկացվեն գրքերի շնորհանդեսներ, ընթերցումներ, կլոր սեղաններ, վարպետության դասեր։
Փառատոնն իրականացնում է Արտասահմանյան երկրների հետ մշակութային համագործակցության հայկական հասարակական կազմակերպությունը (ԱՕԿՍ)` ՀՀ մշակույթի նախարարության աջակցությամբ: Առաջին անգամ փառատոնն անցկացվել է 2001 թվականին:
Sputnik Արմենիա պորտալը փառատոնի տեղեկատվական հովանավորն է:
