ԵՐԵՎԱՆ, 20 սեպտեմբերի – Sputnik. The Beatles հանրաճանաչ «լիվերպուլյան քառյակի» ձայնագրման ստուդիայի հետ ստորագրած առաջին պայմանագիրը Նյու Յորքի Heritage աճուրդում վաճառվել է 93.7 հազար դոլարով, հայտնում են ամերիկյան ԶԼՄ-ները:
Աճուրդի տունը նախնական ակնկալում էր այս լոտի վաճառքից ստանալ 150 հազար դոլար: Հատկանշական է, որ մեկ այլ աճուրդի տուն` Sotheby's-ը այս պայմանագիրը գնահատել էր 764 հազար դոլար:
Պայմանագիրը ստորագրվել էր 1961 թվականին քառյակի` Գերմանիայում ելույթ ունենալու ժամանակ: Այն ստորագրել են Ջոն Լենոնը, Փոլ Մակարտնին, Ջորջ Հարիսոնը և Փիտ Բեստը, ով այն ժամանակ խմբում հարվածային գործիքներ էր նվագում:
Heritage-ի ներկայացուցիչ Դինա Հարմեյերի խոսքերով` հնարավոր է, սա երբևէ աճուրդի հանած The Beatles-ին վերաբերող ամենակարևոր փաստաթղթերից է
Մինչև 1960 թվականը The Beatles-ը հայտնի էր միայն Լիվերպուլում և հիմնականում կատարում էր հայտնի ամերիկյան երգերի մշակումներ: 1960 թվականի ամռանը Համբուրգում կայացան խմբի առաջին արտասահմանյան ելույթները: 1961 թվականի ապրիլին Համբուրգի երկրորդ շրջագայության ժամանակ, նրանք առաջին անգամ պրոֆեսիոնալ ձայնագրվեցին` որպես Տոնի Շերիդան երգչին ձայնակցող համույթ` ձայնագրելով My Bonnie / The Saints սինգլը. Ստուդիայում աշխատելու ժամանակ Լենոնը ձայնագրեց իր առաջին երգերից մեկը` Aint She Sweet: Հենց այդ ժամանակ Բիթլերն առաջին անգամ հանրության առջև ներկայացան իրենց նոր սանրվածքներով և ոճով` առաջ սանրած մազեր, և առանց օձիքի բաճկոններ
Խումբն արժանացել է «Գրեմմիի» տասը երաժշտական մրցանակների: Ըստ RollingStone ամսագրի՝ The Beatles-ը «բոլոր ժամանակների 50 լավագույն կատարողների» ցուցակում զբաղեցնում է առաջին տեղը։ Ամերիկյան ձայնագրման ընկերությունների ասոցիացիայի համաձայն` The Beatles-ը ԱՄՆ-ի ֆինանսական առումով ամենահաջողված խումբն էր: Մեծ Բրիտանիայում խմբի ալբոմները այլ կատարողներից ավելի հաճախ էին գրավում հիթ շքերթների առաջին հորիզոնականները: The Beatles-ը նաև, ըստ Billboard ամսագրի, գլխավորել է իրենց ժամանակի ամենահաջողակ խմբերի թոփ-ցուցակը:
