«Ումաթուրմանը» կազմակերպիչներին է մեղադրում երևանյան համերգի չկայանալու համար (Տեսանյութ)

ԵՐԵՎԱՆ, 19 սեպտեմբերի – Sputnik. «Ումատուրման» խմբի մենակատար Վլադիմիր Կրիստովսկին հանդես է եկել հայտարարությամբ, այն մասին, որ «Ումատուրման», «Ռեինկարնացիա» և «Բումբոքս» երեք հանրաճանաչ խմբերի համատեղ համերգը Երևանում չեղյալ է հայտարարվել կազմակերպիչների մեղքով։

Համերգը պետք է տեղի ունենար Երևանում սեպտեմբերի 19-ին Վազգեն Սարգսյանի անվան հանրապետական մարզադաշտին հարող տարածքում

«Ցավոք, կազմակերպիչների մեղքով, ովքեր գումարները չեն փոխանցել և տոմսեր չեն գնել մեզ համար, մենք վաղը չենք ժամանի Երևան։ Ցավոք սրտի։ Մենք շատ էինք ցանկանում ելույթ ունենալ ձեզ մոտ։ Սակայն հույս ունենք, որ մի օր…», – ասել է Կրիստովսկին։

«Բումբոքս» խմբի Facebook–ի էջում նույնպես նշվում է, որ նրանք համերգի չկայացման մեջ մեղադրում են կազմակերպիչներին։

«Բարեկամներ,  կազմակերպիչների կոմպետենտության բացակայության պատճառով մենք ստիպված էինք չեղյալ հայտարարել Երևանում նախատեսված ելույթը։ Ներողություն ենք խնդրում մեր ուկնդիրներից, մենք մինչև վերջին պահը պատրաստ էինք նվագել», – գրել են «Բումբոքս» խմբի անդամները։

Համերգի կազմակերպիչները` One Production ընկերությունը Facebook իր էջում գրել է, որ համերգը չի կայանա, քանի որ նախատեսված քանակով տոմսեր չեն վաճառվել։ Այդ թվում նշվում է, որ ընկերությունը ելույթ ունեցող խմբերին պայմանագրով նախատեսված չափով կանխավճարը կատարել է և կրում է պատասխանատվություն գնված տոմսերի գումարը վերադարձնելու համար։

«Վաճառված տոմսերի գումարը կվերադարձնենք մեկ ամսից, հստակ օրը կտեղեկացնենք նախապես», – գրել են կազմակերպիչները։