Արաբագետ Միգրացիայի վերաբերյալ Ասադի վերջին հայտարարությունը հստակ ուղերձ էր

ԵՐԵՎԱՆ, 19 սեպտեմբերի– Sputnik. Բաշար Ասադի վերջին հայտարարությունն այն մասին, որ Մերձավոր Արևելքից դեպի Եվրոպա միգրացիան բավական լուրջ խնդիր է լինելու նաև Արևմուտքի համար, հստակ ուղերձ էր միջազգային լայն շրջանակներին, որոնք արդեն բախվում են այդ նոր խնդրին, «Sputnik-Արմենիա» ռադիոկայանին հայտնել է արաբագետ Սարգիս Գրիգորյանը:

Արևմուտքի համար լուրջ խնդիր է նաև իսլամիստների հարցը, որոնք Եվրոպայից մեկնում են Մերձավոր Արևելք, կռվում են ահաբեկչական խմբավորումների կազմում և հետո վերադառնում: Այսինքն, ինչպես նկատում է արաբագետը, խնդիրները բավական շատ են և լուրջ Եվրոպայի համար:

«Այդ ստեղծված իրողության հետ Եվրոպան պետք է հաշվի նստի: Խնդիրն այն է, որ Սիրիայի բնակչությունը հիմնակնում փախչում է այն հատվածից, որը գտնվում է ռազմական ակտիվ գործողությունների շրջանում: Խոշոր քաղաքներից նման տենդենց չի նկատվում: Այսինքն, խոշոր քաղաքներում դեռևս կա կայունություն, և այդ քաղաքաները, մեծ հաշվով, կառավարական ուժերի վերահսկողության տակ են: Եվ Ասադը հենց դա էր շեշտում, որ  ի վիճակի են  պայքարել և ահաբեկչության դեմ, և միևնույն ժամանակ ապահովել կայունությունը խոշոր քաղաքներում»,-մեկնաբանել է Սարգիս Գրիգորյանը:

Դեպի Եվրոպա փախստականների հոսքի մեծացումը պայմանավորված է նաև Թուրքիայում տեղի ունեցող իրադարձություններով: «Թուրքիայում ընթանում են բավական լուրջ զարգացումներ՝ կապված PKK-ի դեմ հակամարտության հետ: Այստեղ եվս բավական անկայուն վիճակ է, և այս հատվածում հայտնված փախստականները  փորձում են գնալ այլ երկիր, այսինքն՝ խնդիրը համընդհանուր է»,-ընդգծել է բանախոսը:

Ինչ վերաբերում է կոնկրետ «Իսլամական պետության»-ը եվ այլ ահաբեկչական խմբավորումներին, ապա, ըստ արաբագետի, պատկերը հստակ է. «Իսլամական պետություն»-ն այս փուլում խնդիր ունի և օդային հարվածները թուլացնում են նրա դիրքերը: «Փաստորեն, «Իսլամական պետության» դեմ պայքարն ընդգրկում է առավել լայն շրջանակ: Թուրքիան միացավ այդ պայքարին, չնայած, իմ կարծիքով, դա մի քիչ իմիտացիոն բնույթ ունի: Այլ երկրներ ևս ակտիվորեն ներգրավված են «Իսլամական պետության» դեմ պայքարում: Այդ խմբավորման սահմանները, որտեղ հիմա այն վերահսկողություն է իրականացնում, գծված են, և այս պահին այդ տարածքներն ավելի ընդլայնել, այն չի կարող»,-վստահեցրել է արաբագետ Գրիգորյանը: