Քերիի շնորհավորանքը. ԱՄՆ–ն Հայաստանի գործընկերն ու բարեկամն է

ԵՐԵՎԱՆ, 19 սեպտեմբերի– Sputnik. ԱՄՆ պետքարտուղար Ջոն Քերին նախագահ Բարաք Օբամայի և ամերիկյան ժողովրդի անունից շնորհավորել է Հայաստանի ժողովրդին սեպտեմբերի 21–ին նշվող Անկախության օրվա կապակցությամբ։

«Միացյալ Նահանգները գնահատում է Հայաստանի հետ հարաբերությունները, որոնք ամուր են, ինչպես երբեք, ինչի վկայությունն է Հայաստանի տնտեսությունում ամերիկյան ներդրումների պատմական մակարդակը»,– ասվում է պետդեպարտամենտի պաշտոնական կայքում տեղադրված ուղերձում։

Նա շնորհակալություն է հայտնել Հայաստանի զինծառայողներին այն անձնազոհության համար, որը նրանք դրսևորում են միջազգային խաղաղապահ առաքելություններ իրականացնելիս, ինչպես նաև ընդգծել է հայերի բազմաթիվ ձեռքբերումները, որոնք հարստացնում են երկու ժողովուրդների մշակութային կյանքը։

«Տոնելով անկախության 24–ամյակը` իմացեք, որ ԱՄՆ–ն գործընկեր ու բարեկամ է, լիովին աջակցում է Հայաստանի անվտանգությանը, բարգավաճմանը և ժողովրդավարական զարգացմանը։ Շնորհավորում ենք ողջ աշխարհի բոլոր հայերին, մաղթում խաղաղ և բարգավաճ տարի»,– նշել է ԱՄՆ–ի պետքարտուղարը։