ԵՐԵՎԱՆ, 17 սեպտեմբերի– Sputnik. Ներդրողը երբ որոշում է գնել որևէ ընկերություն, պատվիրում է իրավական փորձաքննություն: Հանրային ծառայությունները կարգավորող հանձնաժողովի կողմից խորհրդատվությունն իրականում իրավական փորձաքննություն է, «Sputnik-Արմենիա» ռադիոկայանի հետ զրույցում ասել է տնտեսագետ Արտակ Մանուկյանը՝ խոսելով ՀԷՑ-ի վաճառքի մասին:
«Հասկանալի է, որ եթե ներդրողն ունի հետաքրքրվածություն, ուրեմն աուդիտ է իրականացնում, որպեսզի հասկանա, թե ինչ է գնելու և պատկերացում կազմի գնի մասին, այսինքն՝ այս բոլորով հանդերձ, հիմք է տալիս ենթադրելու, որ դրա արդյունքում ՀԷՑ-ը պետք է վաճառվի»,-մեկնաբանել է տնտեսագետը:
Նրա խոսքով՝ այս ամենի արդյունքում էլ, ըստ էության, կունենանք «ՀԷՑ» բրենդ, որն ասոցացվում էր կոռուպցիայի և այլ բացասական երևույթների հետ: «Հիմա այդ բացասական ասոցացիան փորձում են ջնջել հասարակության մեջից: Եվ չեմ բացառում, որ որևէ էական բան չփոխվի, իհարկե, այս պահին բաժնետերերի մասին տեղեկատվություն չենք կարող ասել: Բայց ինձ թվում է, որ սա հնարավորություն է, որ իշխանությունները ևս մեկ անգամ հասարակության ուշադրությունը շեղեն, որովետև անկեղծության պահին Երվանդ Զախարյանը հայտարարել է, որ ՀԷՑ-ում կա կոռուպցիա և թալան»,-ասել է բանախոսը:
Նա նաև հավելել է, որ հիմա, երբ ընկերության սեփականատերը փոխվում է, իշխանությունը կարող է այդ հայտարարությունն անել: Այնուհանդերձ տնտեսագետը նկատում է, որ շատ հարցեր մնում են անպատասխան. այդ չարաշահումներին մասնակցել են թե տեղական ընկերությունները, թե պատկան մարմինները, հետևաբար՝պետք է լինեն պատասխանատվության ենթարկվողներ: «Հակառակ դեպքում անպատժելիության մթնոլորտն այդպես էլ կշարունակվի»,-ընդգծել է նա:
Ինչ վերաբերում է նախագահի՝ «Հայաստանի էլեկտրական ցանցեր» ընկերությունում աուդիտ անցկացնելու մասին հայտարարությանը, ապա Արտակ Մանուկյանը չի բացառում, որ այդ աուդիտը լինի ոչ թե չարաշահումների կամ բացթողումների ուսումնասիրություն, այլ այս դեպքում ներդրողի կողմից իրականացվող աուդիտ: «Այսինքն՝ գնորդը որոշի գնվող ապրանքի կամ ընկերության հնարավոր գինը, իմանա, թե ինչ է ժառանգում իր վճարած գումարի դիմաց: Այսինքն՝ աուդիտը կշարունակվի սեպտեմբերի 30-ից հետո, բայց արդեն ՀԷՑ-ը չի լինի դրա վճարողը, արդեն կլինի ներդրողը կամ վաճառքի գումարից կհանվի»,-պարզաբանել է տնտեսագետը:
Տնտեսագետ. Բացասական երևույթների հետ ասոցացվող «ՀԷՑ» բրենդը փորձում են ջնջել հասարակության գիտակցությունից
© PanARMENIAN Photo
Բաժանորդագրվել
Արտակ Մանուկյանը չի բացառում, որ այդ աուդիտը լինի ոչ թե չարաշահումների կամ բացթողումների ուսումնասիրություն, այլ ներդրողի կողմից իրականացվող աուդիտ
