Չիլիում գրանցված երկրաշարժից հետո ցունամիի սպառնալիքը չեղյալ է հայտարարվել

ԵՐԵՎԱՆ, 17 սեպտեմբերի– Sputnik.  Չիլիում գրանցված 8,3 մագնիտուդով երկրաշարժից հետո` իշխանությունների կողմից հայտարարված ցունամիի վտանգի մասին զգուշացումը չեղյալ է հայտարարվել, հաղորդում է Ռոյթեր գործակալությունը։

«Երկրի ողջ տարածքում ցունամիի վտանգը չեղյալ է հայտարարվել», – գործակալությունը մեջբերում է Չիլիի արտակարգ իրավիճակների ազգային վարչության հայտարարությունը։

Երկրաշարժը գրանցվել է UTC ժամանակով չորեքշաբթի ժամը 22։54–ին (Երևանի ժամանակով հինգշաբթի ժամը 02։54)։ Ստորգետնյա ցնցումների էպիկենտրոնը գտնվել է Իլյապել քաղաքից 46 կմ դեպի հյուսիս–արևմուտք` երկրի մայրաքաղաք Սանտյագոյից 228 կմ դեպի հյուսիս։ Երկրաշարժի օջախը գտնվել է 8,3 կմ խորության վրա։

Երկրաշարժին հետևել է 6,4 մագնիտուդով հետցնցում։ Չիլիի արտակարգ իրավիճակների ազգային ծառայությունը տեղեկացրել է Կոկիմբո քաղաքում գրանցված ցունամիի 4,5 մետրանոց ալիքների մասին։ Երկրաշարժի զոհերի թիվը հասել է հինգի, ևս մոտ 1 միլիոնը տարհանվել է։