Չորս տարվա ազատազրկում կացնահարելու համար

ԵՐԵՎԱՆ, 17 սեպտեմբերի — Sputnik.. Մորը սեռական բնույթի առաջարկություն անելու համար վերջինիս ծանոթ տղամարդուն կացնահարելու մեջ մեղադրվող Վահե Մուշադյանը դատապարտվել է ազատազրկման՝ 4 տարի ժամկետով,  գրում է «Փաստինֆո»-ն:

Նա մեղավոր  է ճանաչվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ առողջությանը ծանր վնաս պատճառելը:
 
Վահե Մուշադյանը, ըստ մեղադրանքի,  2015թ. հունվարի 23-ին ժամը 00։10-ից մինչև 02։55-ն ընկած ժամանակահատվածում իր տանը հաց է կերել և ոգելից խմիչք օգտագործել մոր և նրա ծանոթի հետ։
 
Կայքի հավաստմամբ, Մոր ծանոթի խնդրանքով Վահե Մուշեղյանը մորը և ծանոթին մենակ է  թողնել։ Այնուհետև, նա լսել է, որ մոր ծանոթը  մորը սեռական բնույթի առաջարկություն է արել, ինչից բարկացել է, վերցրել է մուտքի դռան մոտ դրված կացինը և հարվածել մոր ծանոթին։ Վերջինիս գլխի գագաթային շրջանում  պատճառել է մարմնական վնասվածք` գլխի գագաթային ներհրված կոտրվածք, սուբարախնոիդալ արյունազեղման ձևով։
 
Ամբաստանյալն իրեն լիովին մեղավոր է ճանաչել և միջնորդել գործը քննել արագացված կարգով՝ դատարանը բավարարել է միջնորդությունը:
 
Դատարանն որպես ամբաստանյալի պատասխանատվությունը և պատիժը մեղմացնող հանգամանքներ  հաշվի է առել այն, որ  ամբաստանյալն է զանգահարել ոստիկանություն և հայտնել կատարված հանցագործության մասին, անկեղծորեն զղջում է։  Դատարանի գնահատմամբ, որպես ամբաստանյալի պատասխանատվությունը և պատիժը ծանրացնող հանգամանք է հանցանքը կատարելու ռեցիդիվը, ինչպես նաև այն, որ նա հանցանքը կատարել է ալկոհոլի ազդեցության տակ։
 
Դատարանը հաշվի է առել նաև, որ կատարված հանցագործությունը պայմանավորվել է տուժողի վարքագծի հակաբարոյականությամբ։