Քաղաքագետ. ՀԱՊԿ-ը երբեք էլ չի միջամտի հայ-ադրբեջանական սահմանին տեղի ունեցող բախումներին

ԵՐԵՎԱՆ,  15 սեպտեմբերի — Sputnik. Հայ-ադրբեջանական սահմանին տեղի ունեցող բախումներին ՀԱՊԿ-ը երբեք էլ չի միջամտի, որովհետև դա իր հետաքրքրությունների շրջանակից դուրս է: Հետևապես, պետք չէ զարմանալ, թե ինչու այդ կառույցը չի միջամտում հայ-ադրբեջանական հակամարտությանը: «Sputnik-Արմենիա» ռադիոկայանի հետ զրույցում նման համոզմունք է հայտնել քաղաքագետ Մանվել Սարգսյանը՝ խոսելով ՀՀ նախագահի՝ Դուշանբեում ունեցած ելույթի մասին:

ՀԱՊԿ հավաքական անվտանգության խորհրդի նստաշրջանում Հայաստանի նախագահը հայտարարել է, որ Հայաստանի և Ադրբեջանի սահմանին իրավիճակի սրումը հանգեցնում է ամբողջ տարածաշրջանի ապակայունացմանը:

«Ես կարծում եմ, որ վերջին տարիներին բոլորը համոզվել են, որ Ռուսաստանի կողմից հետխորհրդային տարածքում ձեռնարկած ցանկացած ինտեգրացիոն ծրագիր ՝  գեոստրատեգիկ մեխանիզմ է: Ռուսաստանն իր ազդեցութունն ապահովվելու համար առաջարկել է բազմաթիվ կառույցներ, որոնցից մեկն էլ և ամենազդեցիկը՝ ՀԱՊԿ-ն է»,-նշել է նա:

Հավաքական անվտանգության պայմանագրի կազմակերպությունը կարող է վերածվել գործող մեխանիզմի, ունենա զորքեր, սակայն ինչպես հավելում է քաղաքագետը, տվյալ պահին դա որևէ մեկին չի հետաքրքրում: «Նման բան գոյություն էլ չունի և երբևէ չի էլ ունենալու: Ճիշտ է, փորձում են մի ուղղություն զարգացնել, որը, կարծես թե, բոլոր երկրների շահերից է բխում, այն է՝ եթե ՀԱՊԿ-ի անդամ երկրում առկա է սպառնալիք, ապա այն պետք է միջամտի: Մեծ դժվարությամբ է այդ ուղղությունը զարգանում, չնայած այն բխում է բոլոր երկրների շահերից, բոլորը կցանկանամ, որ ՀԱՊԿ-ն ունենա նման գործառույթ: Բայց անգամ դա զարգացում չի ապրել»,-ընդգծել է Մանվել Սարգսյանը:

ՀԱՊԿ-ը կարող է չմիջամտել, սակայն, ըստ քաղաքագետի, այն կարող է Ռուսաստանի համար ապահովել ռազմական քաղաքականություն: Այսինքն, ՀԱՊԿ-ն ունի աշխատելու ռեալ մեխանիզմներ, բայց այդ մեխանիզմները չեն արտացոլվում պայմանագրային տեքստերում: «Սրանք գեոստրատեգիական ռեալ գործող մեխանիզմներ են, որոնց բնույթը պարզ է միայն նրանց համար, ովքեր ստեղծել են դա, և նրանց համար, ովքեր արդեն զգում են դա իրենց մաշկի վրա»,-ասել է բանախոսը: