Մոգերինի. Միգրանտների վերաբերյալ տարաձայնությունների պատճառով ԵՄ–ի հեղինակությունը սպառնալիքի տակ է հայտնվել

ԵՐԵՎԱՆ, 15 սեպտեմբերի  — Sputnik. Եվրամիության միջազգային հեղինակությունը վտանգված է անօրինական միգրանտների ընդունման հարցում առկա տարաձայնությունների պատճառով, երեքշաբթի ասել է եվրոպական դիվանագիտության ղեկավար Ֆեդերիկա Մոգերինին։

«Մեր ներքին միաբանությունը կամ դրա պակասը ազդում են միջազգային ասպարեզում մեր նկատմամբ ունեցած վստահության վրա և արտացոլվում են մեր գործողությունների արդյունավետության վրա»,– ասել է նա` ելույթ ունենալով Եվրահանձնաժողովում միգրացիոն ճգնաժամի հարցերի շուրջ լսումների ժամանակ։

Երկուշաբթի Բրյուսելում կայացած հրատապ հանդիպման ընթացքում Եվրամիության երկրների ներքին գործերի նախարարները պայմանավորվել են Իտալիա և Հունաստան ժամանած 40 հազար փախստականներից 34 հազարին տեղաբաշխել երկու տարում։

Պարտադիր քվոտաների հիման վրա ևս 120 հազար միգրանտի ընդունելու պայմանավորվածության հասնել չհաջողվեց, թեև դա պնդում էր Եվրահանձնաժողովը։ Այժմ վերջնական որոշումը Լյուքսեմբուրգում պետք է կայացնի ԵՄ–ի ներքին գործերի Խորհուրդը հոկտեմբերի 8–ին։

Ակնկալվում է, որ Եվրամիության երկրների համար անօրինական միգրանտների ընդունման ազգային քվոտաներ սահմանելու որոշումը, եթե նախարարներին կրկին չհաջողվի հաղթահարել տարաձայնությունները, կընդունի, այսպես կոչված, «որակավորում ունեցող մեծամասնությունը», որի դեպքում ԵՄ–ի խոշոր երկրներն ունեն ձայների մեծամասնությունը։

Եվրահանձնաժողովը մշակել է առաջիկա երկու տարիներին Մերձավոր Արևելքի երկրներից և Աֆրիկայից ազգային քվոտաներով փախստականների ընդունման առաջարկությունը, որի հետ մինչ օրս համաձայն չէին գլխավորապես Հունգարիան, Լեհաստանը, Չեխիան և Սլովակիան։

2015 թվականի սկզբից Եվրամիության տարածք է ժամանել մոտ 500 հազար միգրանտ, ամեն օր նրանց շարքերը համալրվում են նորեկներով։ Եվրահանձնաժողովը հայտնել է, որ աշխարհի ներկայիս միգրացիոն ճգնաժամը խոշորագույնն է Երկրորդ համաշխարհային պատերազմի տարիներից։