Հանրահռչակ դաշնակահարուհին Երևանում կներկայանա համերգային ծրագրով

ԵՐԵՎԱՆ, 15 սեպտեմբերի – Sputnik. Արամ Խաչատրյան մեծ համերգասրահում այսօր և սեպտեմբերի 17-ին տեղի կունենա  դաշնակահարուհի, միջազգային մրցույթների դափնեկիր Նարե Արղամանյանի համերգը:

Նոր լուսավորվածությամբ, դեկորային նուրբ լուծումներով և հիմնանորոգված համերգասրահում կհնչեն Լյուդվիգ վան Բեթհովենի երկրորդ սինֆոնիան, Սերգեյ Ռախմանինովի դաշնամուրային երրորդ կոնցերտը և այլ գլուխգործոցներ:

Համերգային ծրագիրն անցկացվում է Երևանյան 9-րդ միջազգային երաժշտական փառատոնի շրջանակում, որն այս տարի նվիրված է Հայոց ցեղասպանության 100-րդ տարելիցին:

«Սպուտնիկ Արմենիա» պորտալին դաշնակահարուհին պատմեց, որ համերգացանկն ընտրված է նրբանկատորեն և իր մեջ ամփոփում է ամբողջ խորագիրը: «Ընտրված ստեղծագործություններում կա ցավ, սակայն միևնույն ժամանակ՝ վերածննդի գաղափար: Այս ամենը վառ կերպով ամփոփված է հատկապես Ռախմանինովի երրորդ դաշնամուրային կոնցերտում, որտեղ վառ արտահայտված է մարդկային էմոցիաների գամման: Նույնը կարելի է ասել Բեթհովենի երկրորդ սինֆոնիայի մասին՝ ցավ, զգացմունք, սակայն հաղթանակի հանգրվանով»,-ասաց Արղամանյանը:

Այս նույն մոտեցմամբ էլ առաջնորդվել են սեպտեմբերի 17-ի համերգի ստեղծագործություններն ընտրելիս: Այդ օրը կհնչեն Շուբերտի ֆանտազիան, Բրամսի կվարտետը, որոնք թեև բավական տրագիկ ստեղծագործություններ են, սակայն դաշնակահարուհու համոզմամբ, դրանցում առկա է լույս՝ ապագայի հանդեպ: Հաճելի անակնկալներն այսքանով չեն ավարտվում:

Հայ երաժշտասեր հանրությունը հնարավորություն կունենա ունկնդրելու ոչ միայն Նարեի, այլև հռչակավոր երաժիշտների կատարումներ, այդ թվում՝ Կիմ Քաշքաշյանի, Ալեքսանդր Չաուշյանի, Մարիաննա Շիրինյանի, Անուշ Նիկողոսյանի:

Նարե Արղամանյանը, չնայած երիտասարդ տարիքին, հասցրել է նվաճել համաշխարհային բեմեր, գրավել մեծ լսարաններ, վաստակել հարազատ և օտար հանդիսատեսի համակրանքը, արժանանալ բազմաթիվ հատուկ մրցանակների: Մասնակցել է երկու տասնյակից ավելի միջազգային մրցույթների:

«Ինձ համար ամենահիշարժան մրցույթը եղել է 2008-ին՝ Մոնրեալի հեղինակավոր միջազգային երաժշտական մրցույթի երեք գլխավոր մրցանակներին, այդ թվում՝ «Գրան Պրի»-ին արժանանալը»,-հավելեց երաժիշտը։

Նարեի կենսագրությունը հարուստ է դափնիներով, մրցանակներով և փառատոներին մասնակցությամբ: Երևանյան 9-րդ միջազգային երաժշտական փառատոնի շրջանակում հայ հանդիսատեսին առիթ է ընձեռվել ունկնդրելու Նարե Արղամանյանի կատարումները: Փառատոնն անցկացվում է ՀՀ առաջին տիկին Ռիտա Սարգսյանի հովանու ներքո և Մշակույթի նախարարության աջակցությամբ: