ԶԼՄ. Մարադոնան Բլատերին գող է անվանել, Պլատինիին` ստախոս

ԵՐԵՎԱՆ, 15 սեպտեմբերի – Sputnik. Արգենտինայի ֆուտբոլի հավաքականի նախկին գլխավոր մարզիչ և ավագ Դիեգո Մարադոնան ՖԻՖԱ–ի նախագահ Յոզեֆ Բլատերին անվանել է «գող», իսկ ՈՒԵՖԱ–ի նախագահ Միշել Պլատինիին` «խաբեբա», գրում է Спорт Экспресс–ը։

Յոզեֆ Բլատերն, ով ՖԻՖԱ–ն գլխավորում էր 1998 թվականից և կազմակերպության ութերորդ նախագահն է, մայիսի 29-ին վերընտրվել էր հինգերորդ անգամ, իսկ արդեն հունիսի 2-ին մեծ կոռուպցիոն սկանդալի ֆոնին հայտարարեց պաշտոնը լքելու որոշման մասին։ Նա կշարունակի կատարել իր պարտականությունները մինչև ՖԻՖԱ–ի նոր նախագահի ընտրությունները, որոնք անցկացվելու են 2016 թվականի փետրվարին կազմակերպության` Ցյուրիխում կայանալիք կոնգրեսի ժամանակ։

Մարադոնան պատրաստվում է իր թեկնածությունն առաջադրել։ Արգենտինացուն դուր չի եկել, որ 79-ամյա շվեյցարացին պաշտոնը լքելու իր հայտարարությունից հետո հրապարակային հարցազրույց չի տվել։

«Նա մեկուսացել է ողջ աշխարհից, այնպես որ այժմ նա բանտում է։ Սա նշանակում է, որ նա գող է։ Ինչ վերաբերում է Պլատինիին, ապա նա էլ ստախոս է։ Բլատերը նրան ստել է սովորեցրել», – Մարադոնային մեջբերում է L'Equipe–ը։

ՖԻՖԱ–ի նախագահի պաշտոնի համար իր թեկնածությունն առաջադրելու մտադրության մասին ավելի վաղ հայտարարել էր նաև ՈՒԵՖԱ–ի նախագահ Միշել Պլատինին։