Շախմատիստ Գաբրիել Սարգսյանն Աշխարհի գավաթի երկրորդ փուլ է անցել

ԵՐԵՎԱՆ, 13 սեպտեմբերի- Sputnik. Հայ գրոսմայստեր Գաբրիել Սարգսյանն Բաքվում ընթացող շախմատի Աշխարհի գավաթի երկրորդ փուլ է անցել՝ դժվարին պայքարում պարտության մատնելով լեհ Մատեուշ Բարտելին: Այս մասին հայտնում է chesspro.ru կայքը:

Կիրակի Սարգսյանին հաջողվել է մրցակցից առաջ անցնել միայն «արմագեդոնում» (որոշիչ պարտիա թայ-բրեքում, որն անցկացվում է անսովոր պայմաններում):

Ավելի վաղ հայտնի էր դարձել, որ մրցաշարի երկրորդ փուլ են անցել Լևոն Արոնյանն ու Հրանտ Մելքումյանը:

Հայաստանի ևս մեկ ներկայացուցիչ՝ Սամվել Տեր-Սահակյանը, դուրս է մնացել պայքարից՝ թայ-բրեքում զիջելով ռուս Նիկիտա Վիտյուգովին:

Աշխարհի գավաթի համար պայքարում է 128 շախմատիստ: Կանոնների համաձայն, մասնակիցները խաղում են միմյանց հետ ժամանակի դասական հսկողությամբ (90 րոպե առաջին 40 քայլերի համար, այնուհետև 30 րոպե մինչև խաղի ավարտը՝ խաղի սկզբից յուրաքանչյուր քայլին 30 վայրկյան ավելացնելով):

Երկու պարտիաներից հետո ոչ-ոքիի դեպքում մրցակիցները խաղում են երկու պարտի՝ 25+10 հսկողությամբ: Եթե կրկին ոչ-ոքի է, ապա 10+10 երկու պարտիաներ, այնուհետև՝ 5+3 պարտիաներ: Եթե դրանից հետո էլ մրցակիցները հաշտությամբ բաժանվեն, ապա նախատեսված է «արմագեդոն» (5-ը 4-ի)+3, ոչ-ոքին հօգուտ սևերի: Եզրափակիչ փուլում խաղալու են չորս պարտիաներ ՖԻԴԵ-ի հսկողությամբ:

Ընդհանուր մրցանակային ֆոնդը 1,6 մլն դոլար է, որից հաղթողը ստանում է 96 հազար դոլար, եզրափակիչ փուլ անցածը՝ 1,6 մլն դոլար, կիսաեզրափակիչ փուլ անցած խաղացողները՝ 40 հազար դոլար, քառորդ եզրափակիչ անցածները՝ 28 հազար դոլար: Գավաթի հաղթողը և եզրափակիչ փուլ անցածը ստանում է 2016թ.-ի հավակնորդների մրցաշարին մասնակցելու իրավունք: Մրցաշարը կավարտվի հոկտեմբերի 4-ին: