Ո՞ր մասնագիտություներն են ազդում հոգեկան աշխարհի վրա

ԵՐԵՎԱՆ, 13 սեպտեմբերի- Sputnik. Կան մասնագիտություններ, որոնք խորը ազդեցություն են ունենում մարդու հոգեկան աշխարհի վրա և դրա հետևանքով նրա մոտ ձևավորվում են այդ մասնագիտությանը բնորոշ բնավորության գծեր:

Creu.ru կայքը փորձել է պարզել, թե որոնք են այն մասնագիտությունները, որոնք ազդում են մարդու հոգեվիճակի վրա:

Իրավաբան

Իրավաբանները սովորաբար աչքի են ընկնում կարճ սանրվածքով, խիստ գործնական կոստյումով և գործնական պայուսակով, ինչպես Քիանու Ռիվզի հերոսը «Սատանայի փաստաբանը» ֆիլմում:

Նման պաշտոնական արտաքին տեսքին գումարվում է զուսպ պահվածքը: Այդ մարդիկ միշտ հստակ և հետևողական պատասխան են տալիս հարցերին և սիրում են խոսել մասնագիտական տերմիններով: «Իրավաբանների ձևամոլությունն այդքան էլ անվնաս չէ: Իրավաբանների տեղեկացվածությունը կարող է անցնել թույլատրելի սահմանները, և ժամանակի հետ նրանք կարող են վերածվել ձանձրալի մարդկանց»,- պարզաբանում է «Նավիգատոր» կենտրոնի հոգեբան-խորհրդատու Նադեժդա Կուզմինան:

Հաշվապահ

Շատերն այնքան են մտնում գործնական կերպարի մեջ, որ բծախնդրությունն ու կարգուկանոնի նկատմամբ սերը տեղափոխվում են անձնական կյանք:

Հաշվապահները բծախնդրությունը հաճախ տեղափոխում են ընտանիք: Կինը կամ ամուսինը կարող են չանհանգստանալ. ընտանեկան բյուջեի պլանավորումը հուսալի ձեռքերում է, իսկ բնակարանը միշտ մաքուր է ու հավաքված:

Զինվորական

Այդ մարդիկ երիտասարդ տարիներից վարժվում են խստագույն կարգուկանոնի մթնոլորտին: Պաշտոնաթող զինվորականը ընտանեկան բռնապետի դասական կերպար է: Հոգեբանների կարծիքով՝ զինվորականները ձեռք են բերում անձի ձևափոխման այն տեսակը, որն անհնար է շտկել: Սպան մասնագիտություն չէ, այլ՝ կենսակերպ: Այստեղ չի փրկի նույնիսկ հումորի զգացումը, որը, պետք է ասել, զինվորականների մոտ կամ բացակայում է կամ շատ յուրահատուկ է:

Բժիշկ

Բժշկի մասնագիտությունը հսկայական պատասխանատվություն է ենթադրում, իսկ լարված պայմաններում կատարված աշխատանքն էլ իր հետքն է թողնում: Բոլորին հայտնի բժիշկների ցինիզմը դառնում է յուրօրինակ հոգեբանական պաշտպանություն հիվանդների ամենօրյա վախերից և տանջանքներից: Սև հումորը, որը բժիշկը կարող է իրեն թույլ տալ գործընկերների շրջապատում, ավտոմատ կերպով անցնում է ընկերների և մտերիմների վրա, և դա կարող է վիրավորել նրանց զգացմունքները:

Սովորական կյանքում տեղի ունեցող ողբերգական իրադարձությունները բժիշկները տանում են սպարտացու նման և որոշակի անտարբերությամբ: Սակայն այն, ինչ անտարբերություն է թվում, իրականում հոգեբանական պատ է:

Լրագրող

Ինչպես աշխատանքում, այնպես էլ կյանքում լրագրողները բավական մակերեսային են լինում: Դա հասկանալի է. մասնագիտությունը չի ենթադրում նյութերի մանրազնին ուսումնասիրություն, ուստի լրագրողի հետաքրքրություններն ուղղորդված են ոչ թե խորության, այլ լայնության:

Հոգեբան

Շատ դեպքերում մարդիկ հոգեբան են դառնում, որպեսզի փորձեն լուծել սեփական խնդիրները: Բայց միաժամանակ, որքան էլ տարօրինակ լինի, մինչև կյանքի վերջ հոգեբաններն այդպես էլ չեն կարողանում հաշվեհարդար տեսնել իրենց «ուղեղի որդերի» հետ: Շատ դեպքում նրանք չեն նկատում ենթատեքստը և սկսում են վերլուծել և խորամուխ լինել այլ մարդկանց խնդիրների մեջ և փորձում իրենց խորհուրդները պարտադրել նրանց:

Վաճառքի գծով մենեջեր

Նրանց մասնագիտությունը սովորեցնում է խորամանկություն և հնարամտություն: Չվաճառվող ապրանքն իրացնելու կարողությունն արվեստ է, երբեմն բավական ցածրորակ ապրանքը վաճառելը ստիպում է խորամանկել: