ԵՐԵՎԱՆ, 13 սեպտեմբերի- Sputnik. Բրիտանացի երգիչ սըր Էլթոն Ջոնը հայտնել է, որ ուզում է Ռուսաստանի նախագահ Վլադիմիր Պուտինի հետ քննարկել ԼՀԲՏ (լեսբուհի, հոմոսեքսուալ, բիսեքսուալ, տրանսսեքսուալ) հանրության ներկայացուցիչների իրավունքները:
«Ես կցանկանայի հանդիպել պարոն Պուտինի հետ: Հնարավոր է, որ դա ընդամենը անհասանելի երազանք է… Նա կարող է ծիծաղել, երբ իմ հետևից փակվի դուռը, և ինձ կատարյալ հիմար անվանի, բայց, համենայն դեպս, իմ խիղճը հանգիստ կլինի, որ ես փորձել եմ հանդիպել»,- BBC-ին տված հարցազրույցում ասել է երաժիշտը:
Ավելի վաղ բրիտանացի երգիչ Էլթոն Ջոնը ելույթ էր ունեցել Կիևում, Յալթայի եվրոպական ռազմավարության համաժողովում, որտեղ բարձրացրել էր հանդուրժողականության և մարդու իրավունքների թեմաները՝ մեկնաբանելով Ուկրաինայում ԼՀԲՏ հանրության իրավունքների հետ կապված իրավիճակը: Մասնավորապես, նա կոչ էր արել կոմերցիոն կառույցների ներկայացուցիներին չոտնահարել աշխատակիցների իրավունքները, որոնք պատկանում են սեռական փոքրամասնություններին:
