«ՈՉ» համազգային ճակատը կպայքարի սահմանադրական բարեփոխումների դեմ

ԵՐԵՎԱՆ, 12 սեպտեմբերի– Sputnik. «ՈՉ» համազգային ճակատում ընդգրկվել են մի շարք քաղաքական կուսակցություններ և հասարակական շարժումներ, որոնք դեմ են սահմանադրական բարեփոխումների նախագծին։ Շաբաթ օրը կայացած համաժողովում համազգային ճակատի մասնակիցները հռչակագիր են ընդունել։

«Հայաստանում գործող քաղաքական ուժերը, հասարակական կազմակերպությունները և քաղաքական նախաձեռնությունները, միանալով հռչակագրին, իրենց առջև խնդիր են դնում կասեցնել սահմանադրական բարեփոխումների գործընթացը և իշխող վարչախմբի վերարտադրությունը։ Այդ նպատակին հասնելու համար մենք միավորվում ենք որպես «ՈՉ» ճակատ, նախաձեռնում ենք համաժողովրդական դիմադրություն և Հայաստանի քաղաքացիներին ու հասարակական-քաղաքական բոլոր միավորներին կոչ ենք անում  միանալ երկրում ծավալվող պայքարին»,– ասվում է փաստաթղթում։

Հռչակագրում նշվում է, որ «Սերժ Սարգսյանը և իր վարչախումբը խորհրդարանական համակարգին անցնելու քողի տակ ձեռնարկել են սահմանադրության փոփոխություն, որի հիմնական նպատակն է շրջանցել նախագահական պաշտոնավարման երրորդ ժամկետի սահմանադրական արգելքը և հավերժացնել իրենց  իշխանությունը` համարելով, որ քաղաքական մենաշնորհի հաստատման միջոցով երկրում սահմանադրության ուժով ստեղծվում է պարտոկրատիա և փորձ է արվում ոչնչացնել քաղաքական և հասարակական որևէ հակակշիռ»։

Հռչակագրին միացել են Հայ ազգային կոնգրեսը, Հայաստանի Ժողովրդական կուսակցությունը, «Ժառանգություն» կուսակցությունը, «Հայազն» կուսակցությունը, «Ազգային ինքնորոշում միավորումը», «Հիմնադիր խորհրդարան» շարժումը, Հայաստանի քաղաքագետների միությունը, «Արմատ», «Մարտի 1», «Ազատություն և ժողովրդավարություն» հասարակական կազմակերպությունները, «Ոչ թալանին» նախաձեռնությունը և այլ հասարակական և քաղաքական կազմակերպություններ։

ՀՀ նախագահ Սերժ Սարգսյանը օգոստոսի 21-ին խորհրդարան էր ուղարկել սահմանադրական բարեփոխումների ծրագիրը, որը մշակել էր մասնագիտացված հանձնաժողովը և որով նախատեսվում է անցում կատարել խորհրդարանական կառավարման կարգի։ Նախագահը սկսել է նախագծում հաստատված մոտեցումների վերաբերյալ քննարկումների գործընթացը քաղաքական կուսակցությունների ներկայացուցիչների հետ։

Մայր օրենքի նախագծի գլուխների հրապարակված դրույթները վերաբերում են սահմանադրական կարգի հիմունքներին, մարդու և քաղաքացու հիմնարար իրավունքներին և ազատություններին, սոցիալական, օրենսդրական երաշխիքներին ու տնտեսական և մշակութային ոլորտներում պետական քաղաքականության հիմնական նպատակներին, խորհրդարանի, նախագահի, կառավարության, դատարանների և նոր մարմնի` Գերագույն դատական խորհրդի, դատախազության և քննչական մարմինների, տեղական ինքնակառավարման մարմինների, Օմբուդսմենի, ԿԸՀ–ի գործունեությանը։