ԵՐԵՎԱՆ, 12 սեպտեմբերի– Sputnik. Ադրբեջանի «սև ցուցակում» հայտնվելու հնարավորությունը չի խանգարի բելգիացի պատգամավորներին կրկին Ղարաբաղ այցելելու հարցում, շաբաթ օրը լրագրողներին ասաց Բրյուսելի խորհրդարանի պատգամավոր Սիմոնա Զյուսկինդը։
Բելգիայից ժամանած խորհրդարանականների պատվիրակությունը, Հայաստանից բացի, եղել է նաև Արցախում` այդ երկրների սոցիալ–քաղաքական կյանքին ծանոթանալու նպատակով։
«Ղարաբաղ այցելելուց հետո մենք համապատասխան ծանուցում ենք ստացել Ադրբեջանից, բայց դա մեզ չի խանգարի վերադառնալ Հայաստան և Ղարաբաղ, քանի որ մենք պետք է պատմենք այն իրավիճակի մասին, որն այնտեղ զարգանում է»,– ասաց Զյուսկինդը։
Նրա խոսքով` Եվրոպայի հասարակությունը քիչ գիտի Ղարաբաղի մասին, և անհրաժեշտ է պարբերաբար լուսաբանել այդ երկրում կատարվող իրադարձություններն ու երկրում տիրող իրավիճակը։
«Մենք դա կանենք, դրան նպաստում են մեր այցելությունները։ Բայց եվրոպական քաղաքական գործիչների այցելություններից բացի, պետք է, որ Ղարաբաղից և Հայաստանից պատվիրակությունները մեկնեն եվրոպական կառույցներ և ներկայացնեն իրավիճակը»,– նշեց Զյուսկինդը։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:
