Ֆրանսիացի երգիչ Պատրիկ Ֆիորին կերգի Ղարաբաղի մայրաքաղաքում

ԵՐԵՎԱՆ, 12 սեպտեմբերի– Sputnik. Անվանի ֆրանսիացի երգիչ Պատրիկ Ֆիորին սեպտեմբերի 19–ին ելույթ կունենա Ստեփանակերտի Վերածննդի հրապարակում «Ֆրանսիական օրեր Արցախում» փառատոնի շրջանակում, հայտնում է ԼՂՀ ԱԳՆ–ն։

Պատրիկ Ֆիորին տաղանդավոր երգիչ է, Ֆեբի դերակատարը` Notre Dame de Paris մյուզիքլի օրիգինալ տարբերակում։ Նա մեծացել է մեծ ինտերնացիոնալ ընտանիքում. նրա հայրը հայ է, մայրը` կորսիկացի, ընտանիքում հինգ երեխա է մեծացել։

Փառատոնի շրջանակում Արցախ կժամանեն «Ֆրանսիա-Ղարաբաղ» բարեկամության շրջանակի, Արցախի համայնքների հետ բարեկամացած Ֆրանսիայի քաղաքների,  «Սատար Ղարաբաղին» միության և Ֆրանսիայի հայկական համայնքի մոտ 200 ներկայացուցիչներ, ինչպես նաև արվեստագետներ ու լրագրողներ։

Ֆրանսիական օրեր Արցախում» փառատոնի ծրագրում ընդգրկված են Ստեփանակերտի Ֆրանսիայի պուրակում «Հավերժություն» քանդակի (հեղինակ Թորոս) հանդիսավոր բացման և «Պոլ Էլյուարի Տուն» ֆրանկոֆոնիայի կենտրոնի հիմնարկեքի արարողություններ, գրական-գեղարվեստական ցերեկույթ Ստեփանակերտի թիվ 1 դպրոցում, արցախյան և ֆրանսիական խոհանոցների ներկայացում, «Եզնիկ Մոզյան» արհեստագործական ուսումնարանի բացման արարողություն Շուշիում, ֆրանսիական «Ֆոլիմաժ» ստուդիայի անիմացիոն ֆիլմերի շնորհանդես Շուշիի կերպարվեստի պետական թանգարանում, Ղարաբաղ-Ֆրանսիա բարեկամությունը խորհրդանշող բացիկների պատրաստման մրցույթ Ստեփանակերտի Ս.Շահումյանի անվան պուրակում։ Փառատոնը կավարտվի սեպտեմբերի 19-ին ֆրանսահայ երգիչ Պատրիկ Ֆիորիի համերգով Ստեփանակերտի Վերածննդի հրապարակում։

Փառատոնի նպատակն է սերտացնել Արցախի և Ֆրանսիայի միջև հաստատված բարեկամական կապերը և ընդլայնել երկխոսությունն ու համագործակցության ոլորտները։