Թուրքագետ. Էրդողանը հնարավոր ամեն ինչ անում է միանձնյա իշխանության հասնելու համար

ԵՐԵՎԱՆ, 10 սեպտեմբերի– Sputnik. Թուրքիայի նախագահ Ռեջեփ Թայիփ Էրդողանն ամեն ինչ անում է, որպեսզի հասնի միանձնյա իշխանության, հինգշաբթի «Sputnik-Արմենիա» ռադիոկայանի եթերում ասել է թուրքագետ Հակոբ Չաքրյանը։

«Թուրքիայում այսօր իրավիճակը չափազանց սրված է, և ևս երկու շրջաններում` Խարբերդում և Թունջելիում, Թուրքիայի նախագահի կողմից արտակարգ իրավիճակ հայտարարելը ավելի շատ է խորացրել իրերի դրությունը»,– հավելել է Չաքրյանը։

Փորձագետի կարծիքով` դա չի օգնի թուրքական կողմին երկիրը հանել քաոսից, քանի որ ընտրությունների ընթացքում, որոնք տեղի են ունեցել հունիսի 7–ին Թուրքիայում, Արդարություն և զարգացում կուսակցությունը, որը գլխավորում է Էրդողանը, չի կարողացել հավաքել ձայների անհրաժեշտ քանակություն, որպեսզի ապահովի իրեն միանձնյա իշխանություն։

Նա նշել է, որ մեղավոր է համարվել Ժողորդադեմոկրատական կուսակցությունը։ «Սկզբից Էրդողանը քաոս է ստեղծել երկրի հարավարևելյան շրջաններում, հետո` արևելյան մասում, իսկ հիմա նույն իրավիճակը տիրում է Խարբերդի և Դերսիլի շրջանում»,– նշել է նա։

Նա ընդգծել է, որ դա ուղղված է նրան, որպեսզի այդ շրջանների բնակիչները չկարողանան ակտիվ մասնակցել նոյեմբերի 1–ին նշանակված ընտրություններին, ինչը կհանգեցնի ձայների կրճատմանը քրդամետ Ժողովրդադեմոկրատական կուսակցության օգտին։
 
Թուրքագետը նշել է, որ այդ դեպքում Ժողովրդադեմոկրատական կուսակցությունը չի կարող անցնել անհրաժեշտ 10–տոկոսանոց սահմանը և Թուրքիայում գործող օրենսդրության համաձայն նրա պատգամավորական մանդատները կանցնեն հաղթող կուսակցությանը, այսինքն` Էրդողանի կուսակցությանը, ինչը կապահովի նրան միանձնյա իշխանություն։

Թուրքիայում հունիսի 7–ին կայացած հերթական խորհրդարանական ընտրությունների արդյունքում իշխող Արդարություն և զարգացում կուսակցությունը ստացել է ընտրողների ձայների 40,8 տոկոսը և 258 տեղ խորհրդարանում։ Սակայն նա կորցրել է խորհրդարանական մեծամասնությունը և չի կարող միայնակ կառավարություն ձևավորել։

Ձախակողմյան Ժողովրդադեմոկրատական կուսակցությունը ստացել է ձայների 25 տոկոսը և 132 տեղ խորհրդարանում, ազգայնական Ազգային շարժում կուսակցությունը` 16,4 տոկոսը և 80 տեղ, քրդամետ Ժողովրդադեմոկրատական կուսակցությունը` 13,1 տոկոս և 80 տեղ։